24.12.2021
bügünki türkiye metbuatliridin tallap teyyarlighan xewerlirimizning qisqiche mezmunliri töwendikiche:
türkiye awazi radiyosi: «sabah» géziti: «türk lirasi erdoghanning tashlighan qedimi bilen kücheydi» serlewhilik xewiride, jumhur reis rejep tayyip erdoghanning iqtisadqa munasiwetlik tashlighan qedimi sayisida bankilardiki tashqi péréwot qoghdilinidighan türk lirasi amanet pul hésabatlirigha 10 milyard türk lirasining yatquzulghanliqini, 700 milyon dollarliq tashqi péréwot hésabatining türk lirasigha aylandurulushi üchün bankilargha iltimas sunghanliqini yazdi.
gézitning xewiride körsitilishiche, dollar, yawro we altun bahasining rékort derijide töwenlishige yol achqan chékinish we erdoghangha bolghan ishenchke mas halda iqtisadtiki türk lirasini kücheytidighan tereqqiyatlar arqa - arqidin yüz bergen.
«hörriyet» géziti: «sehiye ministiri kojaning turkowak bayanati» serlewhilik xewiride, (türkiye jumhuriyiti) sehiye ministiri fahrettin kojaning, türkümlep ishlepchiqirilish basquchigha qedem qoyghan yerlik waksina — turkowakning ilim - pen dunyasini hayajanlandurghanliqini bildürüp: «biz turkowak waksinisini saqlawatqanlargha we toluqlap emlitish üchün turkowakni tallighanlargha <bu küreshni öz waksinanglar bilen élip barisiler> dégenni uqturushni xalaymiz» dégenlikini oqurmenliri bilen ortaqlashti.
«weten» géziti: «türkiye dunya bazarlirining merkiziy nuqtisida» serlewhilik xewiride, xezine we maliye ministiri nurettin nebatining, türkiyening iqtisad modélining démokratik enenige ige, erkin bazar iqtisadigha baghliq bir modél ikenlikini otturigha qoyup, uning «ul eslihelirini tamamlighan, eshya oborotini emelge ashurghan we dunya bazarlirining merkiziy nuqtisidiki bir dölet» ikenlikini, iqtisadiy ul eslihelirini tereqqiy qildurush musapiside adettin tashqiri muweppeqiyetlerni qolgha keltürgenlikini éytqanliqini yazdi.
«star» géziti: «türkiye ishlepchiqirish merkizi we teminlesh bazisigha aylinish yolida achquchluq qedem tashlidi» serlewhilik xewiride, istanbul uniwérsitéti oqutquchisi piroféssor doktor sefer shenerning, wuxen wirusining tarqilishidin kéyin iqtisadtin siyasetkiche bolghan barliq sahelerde yéngi bir dunya tertipige ötüsh süritining ashqanliqini, türkiyening weziyettin ünümlük paydilinip, ishlepchiqirish merkizi we teminlesh bazisigha aylinish üchün kilassik iqtisad chüshenchisidin halqip chiqqanliqini ilgiri sürüp: «pütkül dunya pul paxalliqining küchiyip kétishige qarshi pul siyasetlirini chéngitqan bolsa, türkiyening diqqitini ishlepchiqirish we ishqa orunlashturushni ashurup, iqtisadiy éshishqa kapaletlik qilishqa merkezleshtürgenliki» ni éytqanliqini yazdi.
«yéngi shepeq» géziti: «bosniye- gértségowinaliq qomandan milliy uchquchisiz hawa apparati merkizini ékskursiye qildi» serlewhilik xewiride, bosniye- gértségowina armiyesi bash ishtab bashliqi, léyténant général sénad masowichning bayraqtar döletlik uchquchisiz hawa apparati tetqiq qilish — tereqqiy qildurush we ishlepchiqirish merkizini ékskursiye qilghanliqini, bayraqtar téxnologiye shirkiti mudiri selchuq bayraqtarning masowichqa hemrah bolghanliqini yazdi.
gézitning xewiride körsitilishiche, selchuq bayraqtar masowichning ziyaritige munasiwetlik ijtimaiy taratquda hembehriligen uchurida, bosniye- gértségowinaning tunji nöwetlik pirézidénti aliya izzetbégowichning: «yersharining oqutquchisi bolmay turup, asmanning oqughuchisi bolushimiz kérek!» dégen sözige orun bergen.
