14.01.2021

«‹weten› géziti», «jumhur reis erdoghan yerlik we milliysini qurup chiqidighanliqini élan qildi» serlewhilik xewiride, munu uchurlargha orun ajratti:

jumhur reis rejep tayyip erdoghan türkiyening yerlik we milliy ul eslihelirining küch - qudritini arzu qilinghan sewiyege chiqirishqa ishinidighanliqini bildürdi. erdoghan tünügün jumhur reislik külliyeside ötküzülgen radiyo téléwiziye jemiyiti 2019 – yilliq oskar mukapati murasimida, téz uchur yollash yumshaq détalliri üstide toxtilip, «inshaallah, buning yerlik we milliysini qurup chiqimiz» dédi.

«‹sabah› géziti»,  «türkiye, pakistan we ezerbeyjan tashqi ishlar ministirliri islamabadta körüshti» serlewhilik xewiride, munu uchurlargha orun ajratti:

tashqi ishlar ministiri mewlut chawuwushoghlu pakistanning paytexti islamabadta ötküzülgen türkiye-ezerbeyjan-pakistan üch terep tashqi ishlar ministirliri yighinidin kéyin, chaqirilghan qoshma axbarat élan yighinida nutuq sözlidi. chawushoghlu bashliqlar yighinida nurghun sahelerde hemkarliship xizmet qilish qarari alghanliqlirini tekitlep: «bixeterlik, muqimliq we bayashatliqni ashurush üchün muhim qedemlerni tashlashni qarar qilduq» dédi.

«‹xewer türk› géziti», «putin jumhur reis erdoghangha qarabagh heqqide téléfon qildi» serlewhilik xewiride, munu uchurlargha orun ajratti:

rusiye prézidénti wiladimir putin düshenbe küni moskwada ezerbeyjan pirézidénti ilham eliyéw we erméniye bash ministiri nikol pashinyan bilen taghliq qarabagh mesilisi üstide élip barghan üch tereplik uchrishish heqqide jumhur reis rejep tayyip erdoghangha melumat berdi. ikki rehber tünügün téléfonda körüshti. söhbette türkiye - rusiye munasiwetlirining kücheytilishige dair tashlinidighan qedemler muzakire qilindi. ,taghliq qarabaghdiki urush toxtitishni kontrol qilish we nazaret qilishqa dair türkiye-rusiye birleshme nazaret merkiziing weziyiti muzakire qilindi.

«‹star› géziti» «tunji <CoronaVac>  waksinisi sehiye ministiri kojagha emlendi» serlewhilik xewiride, munu uchurlargha orun ajratti:

jiddi ishlitish ruxsiti bérilgen tunji <CoronaVac>  waksinisi enqerediki  sheher doxturxanisida sehiye ministiri fahrettin kojagha emlendi. fahrettin koja hemmeylenning choqum waksina emlinishi kéreklikini tekitlep: «chünki bu késellikning aldini élishning eng ünüllük yolliridin birsi waksina emlesh. normal, ilgiriki turmushimizgha qaytish üchün choqum waksina emlinishimiz lazim» dédi.

«‹höriyet› géziti», «ministir warank: <noyabirda sanaet ishlepchiqirish miqdari eng yuqiri döletlerning birige aylanduq> dédi» serlewhilik xewiride, munu uchurlargha orun ajratti:

sanaet we téxnika ministiri mustapa warank tünügün élan qilghan bayanatida, türkiyening noyabirda sanaet ishlepchiqirish miqdarini eng yuqiri kötürgen döletlerning birsige aylanghanliqini bildürüp, «duch kelgen barliq qiyinchiliqlargha qarimay, bizning sanaet ishlepchiqirish nisbitimiz, yilliq %11 we  ayliq %1.3 éshish bilen bazar mölcherliridin alahide yuqiri ishqa ashti. nishanimiz ishlepchiqirishtiki bu éshishni 2021 - yilidimu dawamlashturushtur» dédi.