t d t yéza igilik ministirliri yighini qazaqistanda ötküzüldi

türkiye awazi radiyosi xewiri: qazaqistan yéza igilik ministiri aydarbék saparowning sahibxanliqida, türk döletliri teshkilati yéza igilik ministirliri 3-qétimliq yighini taraz shehiride ötküzüldi.

yighingha, ezerbeyjan yéza igilik ministiri mejnun memmedow, özbékistan yéza igilik ministiri ibrahim abduraxmanow, qirghizistan birinchi muawin yéza igilik ministiri qubat qaséyinow, türkiye muawin yéza igilik we orman ministiri ebubekir gizligider, türk döletliri teshkilatining bash katipi qubanichbék ömüraliyéw qatarliqlar qatnashti.

aydarbék saparow yighinning échilishida söz qilip, qazaqistan soda omumiy sommisining %28 ning t d t gha eza döletlerge ait ikenlikini bildürdi.

u mundaq dédi:

«qazaqistan yüz ölchimi jehette dunyada beshinchi orunda turidu. charwichiliq biz üchün éytqanda hem eneniwi hemde kélechiki parlaq kesipler hésablinidu. shunga, charwichiliq mehsulatlirini sétishqa alahide ehmiyet bérimiz. bu jehette qazaqistanning özbékistan, türkiye, türkmenistan we wéngiriye bazarlirini yuqiri süpetlik gösh mehsulatliri bilen teminleshke teyyar ikenlikini éytmaqchimen.»

t d t bash katipi ömüraliyéw bu qétimqi yighinning yéza igilikde eza döletler otturisida özara hemkarliqlarni küchlendürüshtin bashqa, türk xelqlirini  muqim we ishenchlik yémek-ichmek bilen teminleshni kapaletke ige qilish nuqtisidinmu muhim ehmiyetke ige ikenlikini éytti.

t d t ramkisida sanaet rayonlirini tereqqiy qildurush mesilisimu muzakire qilinghan yighinning axirida, eza döletler xitabname élan qildi.

xitabnamede, tereplerning etrapliq halda özara pikir almashturup, yéza igiliki mehsulatliri sodisini ashurush, yéza igilik istiraxuaniyesi pirogrammilirini ilhamlandurush we munasiwetlik saheler boyiche tetqiqat hemkarliqini kéngeytish mesililiride pikir birliki hasil qilinghanliqi bildürüldi.

yerlik we kilimatqa chidamliq yéza igilik mehsulatliri sortlirini qoghdash we omumlashturush üchün «uruq bankasi» qurush tirishchanliqini dawamlashturushning muhimliqi tekitlengen xitabnamede, t d t ezaliri otturisida ortaq reqemlik yéza igilik sanliq melumat supisi berpa qilish süritini tézlitish mesilisidimu pikir birliki hasil qilinghanliqi körsitildi.

xitabnamede, qazaqistanning taraz shehirini 2024-yili 9-aydin bashlap qazaqistanning taraz shehirini bir yilliq «t d t yéza igilik paytexti» dep élan qilish, kéler qétimliq yéza igilik ministirliri yighinini qirghizistanning cholpan ata shehiride ötküzüshning qarar qilinghanliqi bildürüldi.