erméniye töt yézisini ezerbeyjangha qayturup bérishni qobul qildi

türkiye awazi radiyosi xewiri: ezerbeyjan muawin bash ministiri shahin mustafayéf bilen erméniye muawin bash ministiri mér girigoryan riyasetchilikidiki chégra belgilesh komitétining 8-qétimliq yighini ikki dölet chégrasida ötküzüldi.

ezerbeyjan chégra belgilesh komitéti yighini heqqide yazma bayanat élan qilip, komitétning bezi mesililer toghrisida kélishim hasil qilghanliqini, kélishimge asasen, ezerbeyjanning ghazah wilayiti yönilishidiki chégraning, sowét ittipaqi yimirilgen waqittiki mewjut chégragha asasen békitilidighanliqini bildürdi.

bu liniye baghanis (erméniye) -baghanis ayrim (ezerbeyjan), wosképar (erméniye) -töwenki eskipara (ezerbeyjan), kirants (erméniye) -xeyrimli (ezerbeyjan) we berkabér (erménye)-qizilhajili (ezerbeyjan) yéziliri arisidin ötidu.

kélishimge asasen, erméniyening 1-qarabagh urushida ishghal qiliwalghan baghanis ayrim, töwenki eskipara, xeyrimli we qizihajili yézilirini ezerbeyjangha qayturup béridiken. mezkur rayondiki chégra liniyesining koordénatliri kélishimge aylandurulup, 15-mayghiche imzalinidiken.

yighin jeryanida, terepler yene komitétning birleshme paaliyiti toghrisidiki belgilime layihesini 2024-yili 7-ayning 1-künigiche teyyarlap bolushqa kélishken.

shuning bilen bir waqitta, ezerbeyjan tashqi ishlar ministirliqi bayanatchisi ayxan hajizade ijtimaiy taratqu supisi X tiki adrésida bayanat élan qilip: «bu biz uzundin béri intizar boluwatqan tarixiy weqe. erméniye 1990-yillarning béshidin bashlap ishghal qilip turuwatqan ezerbeyjanning 4 yézisini qayturup bérishke qoshuldi» dégenlerni qeyt qildi.