japparow hindistan bilen herbiy munasiwetlerni kücheytishni arzu qilidighanliqlirini bildürdi

türkiye awazi radiyosi xewiri: qirghizistan pirézidénti sadir japparow ottura asiya ziyariti ramkisida bishkekke yétip kelgen hindistan tashqi ishlar ministiri subraxmanyam jayshankarni huzurida qobul qildi. qobulda, qirghizistan bilen hindistan otturisida xewpsizlik we herbiy munasiwetler saheside hemkarliq ornitish muzakire qilindi.

sadir japparow: «hindistan bilen herbiy mudapie hemkarliqini téximu tereqqiy qildurushni we kücheytishni arzu qilimiz» dédi.

u hindistanning qirghizistanning dora teminligüchisi ikenlikini, toqumchiliq sanaiti, sehiye sayahetchiliki we bashqa sahelerdiki éhtiyajlarni teminleshtimu muhim rol oynawatqanliqini qeyt qildi.

u yéqinqi yillarda ikki dölet otturisidiki soda omumiy hejimining éshiwatqanliqini üstide toxtilip: «qirghizistanning énérgiye, pishshiqlap ishlesh sanaiti, yéza igiliki, tibbiy we sayahet sahelirige biwaste meblegh jelp qilish üchün hindistan bilen hemkarliqlarni téximu kücheytishni ümid qilimiz» dédi.

hindistan tashqi ishlar ministiri subraxmanyam jayshankar ikki dölet munasiwetlirini mustehkemlesh we tereqqiy qildurush iradisini ipadilep, dijitallishish, sehiye we sayahet saheliridiki meblegh sélish layihelirige ehmiyet bérishke teyyar ikenliklirini qeyt qildi.

u ikki dölet munasiwetliri otturisida qirghizistanning ijtimaiy iqtisadiy tereqqiyati üchün muhim ehmiyetke ige 1.5 milyon dollarliq hediye yardimi toghrisida kélishim imzalanghanliqini eskertti.

qirghizistan tashqi ishlar ministirliqining melumatlirida körsitilishiche, hindistan bilen qirghizistan diplomatik munasiwet ornatqan 1992-yili 18-marttin buyan hemkarliq pirinsiplirini öz ichige alghan ortaq xitabname we istratégiyelik shériklik munasiwetlirining ornitilishigha munasiwetlik ortaq xitabname bilen jemiy 62 kélishim imzalanghan.