chishlirimni chotkilaymen, chünki...

«chünki...» namliq programmimizning bu heptilik sanida, salametlikimizge munasiwetlik nahayiti addiy tedbirlerning bizni qandaq chong xeterlerdin ünümlük qoghdaydighanliqi heqqide toxtilimiz. pirogrammimizni «chishlirimni chotkilaymen chünki...» déyish bilen bashlaymiz. 

**** ****** ***** ****

hemmimizge melumki, bedinimizde herbiri ayrim iqtidarlargha ige nurghun sistémilar mewjut. gerche ularning wezipisi bir-birige oxshimisimu, sistémilarning meshghulati hergizmu bir-biridin musteqil emes. bir sistémida körülgen kashila qarimaqqa munasiwetsizdek qilidighan bashqa bir sistémighimu xeter élip kélidu. mesilen, tetqiqatta chish göshi késellikliri bilen yürek késilining baghlinishliq bolush mumkinliki otturigha chiqti.  

bek emes, künimizdin yüz yil ilgiri chish chirish ölümni keltürüp chiqiridighan késelliklerning biri hésablinatti. gerche bu mesile dawalash we dora sanaitidiki tereqqiyatlar bilen tügitilgen bolsimu, éghiz we chishni asrash yenila saghlamliqimiz bilen intayin yéqin munasiwetlik mesile süpitide aldimizda turmaqta. éghiz we chish göshi yallughi bedende omumiy yallughlinishqa seweb bolidighanliqi melum. asta xaraktérlik yallughlinish bolsa, yürek késili, diabit késili we bashqa sistémilardiki tengpungsizliqlargha chétilidu dep qaralmaqta.

******* ***** **** ********

éghiz we chishni asrash aldi bilen késelliklerdin mudapielinish üchün daim qollinilidighan bir yürüsh heriketlerni körsitidu. bularning ichide künde ikki qétim üch minut chish chotkilash eng muhim hésablinidu. chish chotkilash chish taxtisini we éghizdiki baktériyelerni yoqitishtiki eng asasliq chish asrash usuli hésablinidu.

chish chotkilash chish göshini tazilap, qan aylinishni ashurush arqiliq chish göshi saghlamliqini kücheytidu. chishimizni chotkilighanda, éghizdiki yémeklik qalduqliri we baktériyelerdin qutulidighan bolghachqa éghiz purashnimu yoqatqan bolimiz. uningdin bashqa yene, chotkilash chishtiki ziyanliq kislatalarni tazilash arqiliq chishning sezgürliship kétishining aldini alidu. chishni chotkilashtin bashqa, qentlik we kislataliq yémekliklerdin perhiz qilishmu éghiz we chish saghlamliqimizgha nisbeten muhim aldini élish tedbirliri hésablinidu. yilda ikki qétim chish doxturigha körünüsh aghriq peyda qilmaydighan yaki héchqandaq alametliri körülmeydighan késelliklerning aldini élishimizgha yardemchi bolidu.