җумһур рәислик мәһкимисиниң 2021-йиллиқ мәдәнийәт-сәнәт мукапатлири тарқитилди
түркийә җумһурийити җумһур рәислик мәһкимисиниң 2021- йиллиқ мәдәнийәт – сәнәт катта мукапатлирини тарқитиш мурасими пирезидентлиқ мәһкимисидә өткүзүлди.
түркийә авази радийоси хәвири: җумһур рәис рәҗәп таййип әрдоған мукапатларни бәрди вә мурасимида сөз қилип: «(пән – мәдәнийәт саһәсидә мукапатқа еришкән) пирофессор доктор тәоман дурали устазимизни икки һәптә илгири у дунйаға узитип қойдуқ. устазимиз йәрлик вә миллий позитсийәси билән илим – ерпан игиси, йеқинқи дәвр йетиштүргән әң муһим зийалийларниң бири иди» деди.
әрдоған музика саһәсидә мукапатқа еришкән пианино сәнәтчиси идил бирәтниң дөләт ичи - сиртидики консертлири арқилиқ музика саһәсини йүксәк пәллигә көтүргәнликини ейтти.
һәйкәлтираш, сапал вә әйнәк буйум лайиһилигүчиси аләв әбуззийаниң көрүнүшлүк сәнәтләр мукапатиға лайиқ көрүлгәнликини билдүргән әрдоған, киночилиқ саһәсидә мукапатқа еришкән җунәйт аркинниң түрк киночилиқиниң һазирқи һаләткә келишигә зор төһпә қошқанлиқини тәкитлиди.
һөснхәт саһәсидә мукапатқа лайиқ көрүлгән хәттат, журналист вә рәссам әтһәм чалишқанниму тәбриклигән әрдоған, әдәбийат саһәсидә журналист вә йазғучи гурбуз азакниң, кона китабчилиқ саһәсидә ибраһим манавниң мукапатқа еришкәнликини әскәртти.
әрдоған мурасимдики сөзи җәрйанида йәнә: «биз садақәт мукапатимизни пикир дунйасиға әң күчлүк тәсир көрсәткән кишиләрниң бири болған кәмал таһирға беримиз. у нурғун зийалийлиримизға илһам болди» дегәнләрни қәйт қилди.
