«қәтий ирадә» марсқа мувәппәқийәтлик қонди
америка аләм қатниши идариси- наса (NASA), «қәтий ирадә» намлиқ тәкшүрүш машинисиниң марсқа мувәппәқийәтлик қонғанлиқини елан қилди.
түркийә авази радийоси хәвири: насаниң бир тонна еғирлиқтики «ровер» (Rover) типлиқ аләм машиниси «қәтий ирадә», тәхминән йәттә айлиқ сәпәрдин кейин, шәрқий америка вақти 15 тин 55 минут өткәндә марсқа қонди.
наса «қәтий ирадә» ниң марсқа қонуш җәрйанини телевизийәдә тарқатти. узун мусапә сәвәбидин марсқа қонушниң тунҗи көрүнүшлири тәхминән 11 минут кечикиш билән көрүрмәнләргә йәткүзүлди.
насаниң флоридаға җайлашқан кейип канаверал (Cape Canaveral) һава армийә базисидин 2020-йили 30-ийун қойуп берилгән «қәтий ирадә», тәхминән 470 милйон километирлиқ сәпәрдин кейин, пилан қилинған вақит бойичә марсқа мувәппәқийәтлик қонди.
наса бир күн бурун «қәтий ирадә» ниң тоғра линйәдә илгириләватқанлиқини вә мәсилисиз қонушни күтүватқанлиқини билдүргән иди.
«қәтий ирадә» дә 20 данә камера вә бир җуп микрофон бар болуп, йәр шариға нурғун алаһидә көрүнүшләрни әвәтидиғанлиқи, сүрәткә алалайдиған кичик тик учарни учуридиғанлиқи қәйт қилинди.
америка «қәтий ирадә» билән җәмий тоққуз қетим марсқа тәкшүрүш аппарати әвәткән бирдинбир дөләт болуп қалди.
«байқаш» (InSight) вә «қизиқиш» (Curiosity) намлиқ тәкшүрүш аппаратлири һазирму марс орбетасида хизмәтлирини давамлаштурмақта.
