zéléniskiy rusiyening yéngi hujumlargha teyyarliq qiliwatqanliqini ilgiri sürdi
ukraina pirézidénti wolodimir zélénskiy rusiye armiyesining yéngi hujumlargha teyyarliq qiliwatqanliqini we ukrainaning ittipaqdashliri bilen birlikte bu hujumlargha taqabil turushi kéreklikini otturigha qoydi.
türkiye awazi radiyosi xewiri: ukraina pirézidénti wolodimir zélénskiy paytext kiyéwda ziyarette bolghan shimaliy atlantik ehdi teshkilati — nato bash katipi yéns stolténbérg bilen körüshkendin kéyin ötküzülgen qoshma muxbirlarni kütüwélish yighinidiki sözide, ukrainaning amérika qoshma ishtatliri bashchiliqidiki ittipaqdashlirining qoral ewetishini kütüwatqanliqini éytti.
rusiye armiyesining nöwettiki weziyettin paydiliniwatqanliqini tekitligen zélénskiy: «shunga, tézdin (qoral) yetküzüp bérish aldinqi sepning muqimliqigha kapaletlik qilishtin dérek béridu» dédi.
u: «155 kalibérliq zembirekler, yiraq musapilik qorallar, <wetenperwer> sistémiliri qatarliq hawa mudapiesi... bular ittipaqdashlirimizning qolida bar bolghan, nöwette rusiyening ukrainadiki térrorluq xirislirini yoqitish üchün ishlishi kérek bolghan nersiler. rusiye armiyesi yéngi hujumlargha teyyarliq qilmaqta. biz ittipaqdashlirimiz bilen birlikte, rusiyening hujumini tosushimiz kérek» dédi.
wolodimir zélénskiy ukraina armiyesige qilinidighan yardemning waqtida qilinishi heqqide héchqandaq ijabiy nerse körmigenlikige isharet qildi we bu basquchni tézlitishning zörüriyitini otturigha qoydi.
zélénskiy 7-ayda (2024) washingtonda ötküzülidighan nato bashliqlar yighinini tilgha élip: «bu bashliqlar yighini ittipaq üchün bir küch körsitish peyti bolushimu, bolmasliqimu mumkin. ittipaqning bir düshminining natoning küchiyishini ret qilish-qilalmasliqigha u yerde qarar qilinidu. bu qarar ukrainagha munasiwetlik. ukraina natogha kirish teklipini élishqa layiq» dégenlerni qeyt qildi.
