stolténbérg ukrainagha bérilidighan herbiy yardemler we uning nato ezaliqi toghrisida toxtaldi

türkiye awazi radiyosi xewiri: yéns stolténbérg ukraina pirézidénti wolodimir zélénskiy bilen paytext kiyéwda ötküzgen qoshma muxbirlarni kütüwélish yighinida, herbiy yardemlerning kéchikip kétishining urush meydanida «éghir aqiwetlerni keltürüp chiqarghanliqi»gha isharet qilip: «amérika qoshma ishtatliri uda bir qanche ay boyiche bir pilan üstide kélishim hasil qilalmidi. yawropadiki ittipaqdashlarmu biz wede qilghan shekilde oq dora bilen teminliyelmidi» dédi.

u her qandaq herbiy yardemning kéchikishining rusiyening aldinqi septe ilgirilishidin dérek béridighanliqini bildürüp: «emma, ukrainaning ghelibe qilishi üchün hélihem kéyin emes. téximu köp yardem yolda» dédi.

bash katip stolténbérg qoral yetküzüp bérish süritini tézlitishning muhimliqini tekitlep: «biz (qoral bilen) teminleshni kéchiktürüshimizning hayat-mamatliq mesilisi ikenlikini tonup yétishimiz kérek» dégenlerni qeyt qildi.

ittipaqdash döletlerning ukrainagha herbiy yardemni ashurushqa qoshulghanliqini bildürgen bash katip yéns stolténbérg, amérika qoshma ishtatlirining 60 milyard dollarliqtin artuq yardimi hemde engliye, gérmaniye we gollandiyening yéngi wedilirinimu qizghin qarshi alidighanliqini we bashqa ittipaqdash döletlerningmu «yéqinda yéngi bayanatlarni élan qilishi»ni kütüwatqanliqini sözlirige ilawe qildi.

stolténbérg «ukrainaning ornining nato ikenliki»ni otturigha qoyup: «nöwettiki xizmetlirimiz silerni natogha eza bolushning qaytqili bolmaydighan yoligha bashlaydu, shundaq qilip, waqti kelgende, ukraina derhal nato ezasi bolalaydu» dédi.