amérika: irangha yéngi émbargolar yürgüzülüshi mumkin
amérika qoshma ishtatliri maliye ministiri jenét yéllén israiliyege qilghan hujumidin kéyin irangha yéngi émbargolar yürgüzülüsh éhtimalliqining barliqini éytti.
türkiye awazi radiyosi xewiri: jenét yéllén xelqara pul fondi teshkilati we dunya bankasining bahar mewsumi yighinliri dairiside ötküzgen muxbirlarni kütüwélish yighinida, iranning aldinqi hepte axiri (13-aprél kéchisi) da israiliyege qilghan hawa hujumi heqqide toxtilip mundaq dédi:
«amérika qoshma ishtatliri maliye ministirliqi iran hakimiyitinng yaman niyetlik we muqimliqni buzidighan paaliyetlirige dawamliq taqabil turush meqsitide, émbargo yürgüzüsh hoquqimizdin paydilinish üchün ittipaqdashlirimiz bilen izchil hemkarlishidu.»
yéllén iranning aldinqi hepte axiri qilghan hujumliridin tartip qizil déngizda husiylarning hujumlirighiche bolghan iran herbiy heriketlirining, rayonning muqimliqigha tehdit séliwatqanliqini tekitlidi we buning choqum iqtisadiy aqiwetlirining bolidighanliqini qeyt qildi.
u toqunushning téximu keng kölemlik rayonluq we yer shari xaraktérlik toqunushlargha aylinip kétishining aldini élish kéreklikini tekitlep, toqunushning ottura sherq rayonidiki bezi döletlerning iqtisadigha passip tesirlerni körsitiwatqanliqini bildürdi.
u sözide, pat yéqinda irangha qoshumche émbargolarning yürgüzülüshi mumkinlikini eskertti.
u yene, iranning néfit éksport qilish iqtidarini töwenlitish üchün tirishiwatqanliqlirini, emma iranning cheklik néfit éksport qilishni dawamlashturuwatqanliqini, bu mesilide qilishqa tégishlik téximu köp ishlarning bolushi mumkinlikinimu sözlirige ilawe qildi.
