putin yawropa döletlirini ukrainagha béridighan F-16 ayropilanlar toghrisida agahlandurdi

türkiye awazi radiyosi xewiri: wiladimir putin dölet mudapie ministirliqi twér rayonidiki armiye awiyatsiye meshiq merkizini ziyaret qildi؛ u herbiy uchquchilar bilen parangliship, awiyatsiye qisimlirining ukrainadiki toqunushlarda qaltis xizmetlerni qilish arqiliq netijige töhpe qoshqanliqini bildürdi.

pirézidént putin öziningmu bir qanche qétim urush ayropilanigha olturup uchup baqqanliqini, urush ayropilani uchquchilirining xizmitining müshküllükini bayan qilip, rusiyening Su-34 bombardimanchi ayropilani, Su-30 we Su-57 tipliq yéngi ewlad urush ayropilanlirining toqunush rayonida nahayiti yaxshi xizmetlerni qilghanliqini qeyt qildi.

u gherb döletlirining ukrainagha F-16 küreshchi ayropilani bérish we ukraina uchquchilirini meshiqlendürüsh pilanigha baha bérip: «bu, toqunush rayonidiki héchqandaq nersini özgertmeydu. biz bügün köp sitwolluq qoyup bérish sistémiliri, tankilar, bironéwiklar we bashqa herbiy üskünilerni weyran qiliwetkinimizdek, (F-16 tipliq) ayropilanlarnimu weyran qilimiz» dédi.

putin F-16 urush ayropilanlirining yadro qorallirini toshush iqtidarigha ige ikenlikini tilgha élip, bu ayropilanlargha qarshi jeng qilghanda, bu nuqtini nezerge alidighanliqlirini eskertti.

ukrainagha bérilidighan bu ayropilanlar shimaliy atlantik ehdi teshkilati ayrodurumliridin paydilanghan teqdirde, moskwaning tashlaydighan qedemliri toghrisida toxtalghan wiladimir putin: «elwette, eger bu ayropilanlar üchinchi döletlerning ayrodromlirini ishletse, qeyerde bolushidin qetiynezer bizge nisbeten qanunluq zerbe nishangha aylinidu» dédi.

putin amérikaning mudapie chiqimining rusiyeningkidin köp ikenlikige  isharet qilip, rusiyening shimaliy atlantik ehdi teshkilati bilen urush qilishni pilanlawatqanliqi shundaqla baltiq déngizi döletliri we polshagha hujum qilish éhtimalining barliqi toghrisidiki qarashlarning bimene ikenlikini tekitlidi.