нетанйаһу рәфаһқа һуҗум қилиш пиланини тәстиқлиған
исираилийә баш министри нетанйаһу рәфаһқа һуҗум қилиш пиланини тәстиқлиғанлиқини, пуқраларни райондин чиқириш пиланини болса «пат йеқинда» тәстиқлайдиғанлиқини билдүргән.
түркийә авази радийоси хәвири: исираилийә баш министирлиқ ишханиси нетанйаһуниң 18-март (2024) америка пирезиденти җо байдин билән өткүзгән телефон телефон сөһбити тоғрисида байанат елан қилди.
байанатта билдүрүлишичә, нетанйаһу дәсләптә һамасни йоқитиш мәсилисидә байдин билән келишим һасил қилғанлиқлирини илгири сүрүп: «урушта бу нишанға йетишниң әң йахши йоли тоғрисида оттуримизда ихтилапларниң барлиқи сир әмәс» дегән.
нетанйаһу уруш башланған күнләрдә байдинға исираилийә армийәси ғәззәгә кирмәй һамасни йиңишиниң мумкин әмәсликини ейтқан. кейинки күнләрдә болса, һамасниң қепқалған биригадилирини йоқитиш үчүн рәфаһқа кирмәй ғәлибни қолға кәлтүрүшниң мумкин әмәсликини қәйт қилған.
у байдинға мәлумат бәргәндә, исираилийә армийәсиниң рәфаһқа һуҗум қилиш пиланини тәстиқлиғанлиқлирини әскәртип: «пат йеқинда пуқраларни уруш районлиридин тарқақлаштуруш пиланиниму тәстиқлаймиз» дегән.
у йәнә, рәфаһқа һуҗум қилиш пиланиниң бир аз вақит алидиғанлиқини әскәртип мундақ дегән:
«биз хан йунуста, мәркәздики лагерларда, шифада қилғинимизға охшаш, һамасниң йуқири дәриҗилик әмәлдарлирини йоқитиш, тутуш вә йүзләрчә террористни йоқитиш һәрикитимизни давамлаштуримиз.»
исираилийәниң 7-өктәбир (2023) дин буйан давамлаштуруватқан ғәззә һуҗумлирида әң аз дегәндә 14 миң кичик бала, 9 миң 220 айал болуп җәмий 31 миң 923 пәләстинлик җенидин айрилди, 74 миң 96 киши йариланди. харабиликләр астида техичә миңларчә җәсәтниң барлиқи билдүрүлмәктә.
