yette dölet guruhi rehberliri iranni rusiyege yardem bermeslik toghrisida agahlandurdi

türkiye awazi radiyosi xewiri: amérika qoshma ishtatliri, kanada, firansiye, italiye, yaponiye, engliye we gérmaniyedin terkib tapqan yette dölet guruhigha eza döletlerning rehberliri iran qatarliq üchinchi tereplerni, rusiyeni ukraina urushida ishlitilidighan maddiy yardemler bilen teminleshni toxtitishqa chaqirdi.

yette dölet guruhi rehberlirige wakaliten nöwetchi reis italiye teripidin élan qilinghan yazma bayanatta: «biz üchinchi tereplerning rusiyening ukrainagha achqan qanunsiz we yolsiz tajawuzchiliq urushini maddiy yardem bilen teminleshni derhal toxtitishi toghrisidiki chaqiriqimizni qayta tekitleymiz. eksiche bolghanda, ular éghir bedellerni töleydu» dégen ibarilerge orun bérildi.

bayanatta mundaq déyildi: «biz iranning rusiye hakimiyitini ukrainadiki puqralargha qaritilghan rehimsizlerche hujumda ishlitilidighan uchquchisiz hawa apparatliri bilen teminligendin kéyin, ballistik bashqurulidighan bomba we alaqidar téxnikilarni rusiyege bérishni oylishiwatqanliqi toghrisidiki xewerlerdin chongqur endishe qilmaqtimiz. biz iranni bundaq qilmasliqqa chaqirimiz؛ chünki bu rayonning muqimsizliqigha töhpe qoshidu we rusiyening ukrainadiki urushini maddiy jehettin qollashni körünerlik derijide kücheytidu. bu xelqara qanun we birleshken döletler teshkilati nizamnamisige ochuq-ashkara xilapliq qilghanliqtur».

yette dölet guruhi rehberlirining birleshme bayanatida yene: «eger iran rusiyeni ballistik bashqurulidighan bomba yaki munasiwetlik téxnika bilen teminleshni dawamlashtursa, biz irangha qarshi yéngi we muhim tedbirlerni öz ichige alghan téz we mas qedemlik inkas qayturushqa teyyarmiz» dégen ibarilergimu orun bérildi.