amérika merkiziy axbarat idarisi urush bashlinishtin ilgirila baza qurghan

türkiye awazi radiyosi xewiri: niyu york taymés géziti (The New York Times) ukraina we amérikaning yuqiri derijilik istixbarat emeldarlirini neqil qilghan bir xewer élan qilip, ikki dölet istixbarat idariliri otturisidiki munasiwetlerning, 2022-yili féwralda bashlanghan ukraina-rusiye urushidin texminen sekkiz yil ilgiriki waqitlargha tutishidighanliqini bildürdi.

xewerde qeyt qilinishiche, ikki dölet otturisidiki istixbarat hemkarliqliri ukraina-rusiye urushidimu dawamlashqan bolup, washington ukrainadiki puqralirini tarqaqlashturghan bolsimu, istixbarat xadimlirini qaldurghan.

xewerde, merkiziy axbarat idarisining uzun yillardin tartip ukraina istixbarat xadimlirini terbiyeligenliki, üsküne we istixbarat bilen temiligenliki, 14 mexpiy baza qurghanliqi we 2022-yili féwralda bashlanghan urush bilen ukrainaning mudapiesige muhim töhpilerni qoshqanliqi bildürüldi.

xewerde eskertilishiche, amérika merkiziy axbarat idarisi bilen ukraina istixbarat idarisi otturisidiki yéqin munasiwet, urush bashlinishtin texminen sekkiz yil ilgiriki waqitqa toghra kélidighan bolup, amérikaning oxshimighan üch pirézidént dewridimu izchil dawamlashqan.

sabiq sowét ittipaqi tarqalghandin kéyin uzun waqitqiche rusiye fédératsiyesi bilen yéqin munasiwette bolghan kiyéw hökümiti, 2014-yili amérika bilen yéqinlishishqa bashlighan.

amérika merkiziy axbarat idarisi 2016-yili rusiye istixbarat idarisining mexpiy shifirlirini yéshish, rusiye uchqulirini we uchur-alaqe üskünilirini qolgha kirgüzüsh üchün ukraina alahide herbiy qisimlirini terbiyeligen. bu qisimning eskerliridin biri bolghan général kirilo budanow  awghust (2020) éyidin buyan ukraina dölet mudapie ministirliqi istixbarat idarisining bash mudiri bolup wezipe ötimekte iken.

amérika merkiziy axbarat idarisi yene bir tereptin, rusiye, yawropa, kuba we ruslar topliship olturaqlashqan bashqa jaylarda heriket qiliwatqan ukraina istixbarat xadimlirini terbiyelesh ishlirighimu yardem qilghan.

amérika merkiziy axbarat idarisi xadimliri ukrainani urush jeryanida rusiye hujum qilmaqchi bolghan jaylar we ishlitidighan qoral-yaragh sistémilirigha munasiwetlik muhim uchurlar bilen teminligen.

ukraina ichki istixbarat idarisining bixeterlik ishlirigha mesul diréktori iwan bakanow mundaq deydu: «ular bolmighan bolsa, rusiyege qarshiliq körsitish yaki yingish imkaniyitige ige bolalmayttuq.»

amérika merkiziy axbarat idarisining diréktori wilyam j. burns (William J. Burns) terepler otturisidiki hemkarliqlarni izchil dawamlashturush toghrisida bérilgen wedilerni namayan qilish süpitide, ukrainani urush bashlanghandin buyan 10 qétim ziyaret qildi.