шолз билән зеленский украинаниң нөвәттики вәзийити үстидә сөһбәтләшти

түркийә авази радийоси хәвири: германийә һөкүмәт байанатчиси штефен һебештайт йазма байанат елан қилип, баш министир шолзниң украина пирезиденти зеленский билән көрүшүп, украинаниң сийасий, һәрбий вә инсаний вәзийити тоғрисида пикир алмаштурғанлиқини билдүрди.

көрүшүштә, пирезидент зеленский русийәниң ахирқи һуҗумлириниң тәсирлири тоғрисида шолзға мәлумат бәргән вә германийәниң украинаниң һава мудапиәсини күчәйтишкә мунасивәтлик қилған йардими үчүн алаһидә рәһмәт ейтқан.

баш министир шолз русийәниң һуҗумлири қаршисида германийәниң украина билән «тәврәнмәс һәмкарлиқ» ичидә икәнликини вә йавропа һәмдә хәлқарадики башқа шерикләр билән бирликтә йеқин кординатсийә астида украинани һәрбий җәһәттин қоллашни давамлаштуридиғанлиқини билдүргән.

икки рәһбәр көрүшүштә, 2023-йили ийулда өткүзүлгән G7 дөләт гуруһиниң ортақ хитабнамәсини иҗра қилиш рамкисида, икки тәрәпниң бихәтәрлик вә қоллаш келишимлиригә мунасивәтлик давамлишиватқан учришишларни қисқа вақит ичидә ахирлаштуруш тоғрисида пикир бирликигә кәлгән.

мәзкур хитабнамәдә, G7 дөләт гуруһиниң хәлқаралиқ сәһниләрдә етирап қилинған чегралири ичидә өзини қоғдийалайдиған вә кәлгүсидики һуҗумларни чекиндүрәләйдиған, мустәқил, демократик вә игилик һоқуқиға игә украинаниң истратегийәлик нишаниға әмәл қилишта тәврәнмәслики йәнә бир қетим йеңиланған иди.

әнглийә G7дөләт гуруһи ичидә украина билән биринчи болуп 12-йанвар (2024) бихәтәрлик һәмкарлиқ келишими имзалиған дөләт болған иди