rusiye: esker sanimizni 1 milyon 500 mingghiche köpeytimiz

türkiye awazi radiyosi xewiri: paytext moskwada, dölet mudapie ministirliqining kéngeytilgen yuqiri derijilik emeldarlar yighini ötküzüldi.

yighingha, rusiye piréwzidénti wladimir putin, mudapie ministiri sérgéy shoygu we bashqa herbiy emeldarlar qatnashti. dölet mudapie ministiri sérgéy shoygu rusiye-ukraina urushi üstide toxtilip: «alahide herbiy heriket bashlinishtin ilgiri luxansk we donétsk xelq jumhuriyetlirining zéminidin besh hesse chong bolghan zémin, rusiye armiyesi teripidin azad qilindi. référandumlarning netijiside, rusiye fédératsiyesige chongluqi 83 ming kiwadrat kilométir kélidighan 5 milyon nopusqa ige yéngi töt rayon kirgüzüldi. azaq déngizida rusiyening déngiz armiye teweliki shekillendürüldi»  dédi.

u ukraina armiyesining iyun (2023) da bashlighan qayturma hujumlirida éghir zerbe yigenlikini bildürüp, mundaq dédi:

«herbiy heriket bashlanghandin buyan ukraina armiyeside ölgen we yarilanghan eskerler sani 383 mingdin ashti. 14 ming dane tanka we her xil bironiwék, 553 ayropilan, 259 tik uchar, 8 ming 500 din artuq dala zembiriki, minamiyotlar pachaqlap tashlandi. 1427 polshaliq, 466 amérikaliq, 344 engliyelik bolup, jemiy 5 ming 800 din artuq yallanma esker öltürüldi. ukrainada 103 neper urush jinayetchisi yoqitildi.»

u rusiyening mudapie sanaitining ishlepchiqirish iqtidarini töt hesse kücheytidighanliqlirini qeyt qildi.

u mushu bir yil ichide texminen 490 ming neper toxtamliq we pidaiy eskerning élinghanliqini, armiyede chet ellik «pidaiy eskerler» sanining yette hesse köpeygenlikini, yallanma eskerler sanining bolsa alte hesse köpeygenlikini, 650 ming eskerning ukrainada «tejribige ige bolghanliqi» ni eskertti.

u axirida, wladimir putinning esker sanini 1 milyon 320 minggha chiqirish toghrisidiki permani üstide toxtilip: «kelgüsidiki tashqi tehditlerge mas halda armiyediki esker sani 1 milyon 500 mingghiche köpeytilidu» dédi.