сергей лавров: ғәззәдә хәлқара көзитиш комитети қуруш керәк
русийә ташқи ишлар министири сергей лавров исраилийәниң һамасни баһанә қилип, пәләстин хәлқини коллектип җазалашини қәтий қобул қилғили болмайдиғанлиқини тәкитләп, ғәззә районида хәлқара көзитиш комитети қуруш керәклики һәққидә чақириқ елан қилди.
түркийә авази радийоси хәвири: русийә ташқи ишлар министири сергей лавров қатарда өткүзүлгән «ортақ кәлгүси бәрпа қилиш үчүн» темилиқ 21 - нөвәтлик доһа мунбири йиғинида нутуқ сөзлиди.
сергей лавров һамасниң 7 – өктәбир (2023) дә исраилийәгә қилған һуҗуминиң сәвәбсиз әмәсликини әскәртип, мәзкур һуҗумниң әслидә узун йиллардин буйан давамлишиватқан ғәззә қоршави вә пәләстин дөлитиниң қурулушиға мунасивәтлик әмәлгә ашмиған вәдиләрдин кейин йүз бәргәнликини тәкитлиди.
пәләстин дөлити қуралмаслиқниң оттура шәрқтә ашқунлуқни әң улғайтидиған амил икәнликини узун йиллардин буйан исраилийәликләргә чүшәндүрүшкә тиришқанлиқлирини әскәрткән лавров, пәләстин дөлитиниң қанунлуқ салаһийитиниң һәл қилишқа еришәлмәсликиниң райондики әң хәтәрлик амил икәнликини билдүрди.
русийә ташқи ишлар министири лавров: «бирләшкән дөләтләр тәшкилати баш катипи антонийо гутеррес билән ғәззәдә бир хәлқаралиқ көзитиш комитети қурушниң зөрүрлүкини сөһбәтләштуқ. ғәззә районида инсанпәрвәрлик нуқтисидин уруш тохтитишни капаләткә игә қилиш үчүн барлиқ хәлқаралиқ бесимларни ишқа селиш керәкликини музакирә қилдуқ» деди.
