g7 döletler guruhi shimaliy koréyening jasusluq süniy hemrahini qattiq eyiblidi

türkiye awazi radiyosi xewiri: g7 döletler guruhi tashqi ishlar ministirliri shimaliy koréyening «malligyong -1» namliq jasusluq süniy hemrahini toshuydighan rakéta qoyup bérishige munasiwetlik bayanat élan qildi.

bayanatta, bu heriketning rayonning tinchliqi we muqimliqigha éghir tehdit élip kélidighanliqi tekitlinip, «balistik bashqurulidighan bomba téxnikisidin paydilinilghan her qandaq rakita qoyup bérish, birleshken döletler teshkilati xewpsizlik kéngishining qararigha ochuq-ashkara xilapliq qilghanliq hésablinidu» déyildi.

bayanatta, shimaliy koréye hökümiti yadro pilanidin waz kéchishke chaqiriq qilindi we shimaliy koréyening yadro qoral döliti bolush salahiyitige «menggü érishelmeydighanliqi» alahide tekitlendi.

bayanatta, shimaliy koréyening orbitagha bir jasusluq süniy hemrahini tushuydighan rakéta qoyup bérishi küchlük eyiblendi we koréye yérim arilini yadro qoralliridin pütünley tazilashning muhimliqi eskertildi.

uningdin bashqa yene bayanatta, «yadro yaki balistik bashqurulidighan bombigha munasiwetlik téxnikilarni yollash mumkinchilikidin qattiq endishe qiliniwatqanliqi» bildürülüp, «shimaliy koréyening rusiyeni qoral bilen teminlishi» mu qattiq eyiblendi.

shimaliy koréye mesuliri seyshenbe küni (21-noyabir) «malligyong -1» namliq jasusluq süniy hemrahining muweppeqiyetlik halda orbitagha orunlashturulghanliqini élan qilghan idi.