йапонийә билән канадаму ғәззәдә уруш тохтитишни чақириқ қилди

түркийә авази радийоси хәвири: йапонийә ташқи ишлар вәзири камикава йоко токйода өткүзүлгән ахбарат елан қилиш йиғинида, G7 ташқи ишлар министирлири йиғинида ғәззәгә мунасивәтлик қилинған чақириқларни хатириләтти.

у ғәззәдики инсаний киризисни һәл қилиш мәқситидә, йемәк-ичмәк, су, тиббий малзимиләр вә йеқилғу билән тәминләшниң тосалғуға учримаслиқи үчүн дәрһал һәрикәткә өтүшни тәкитләп, барлиқ тәрәпләрниң хәлқаралиқ қанунға мувапиқ һәрикәт қилиши керәкликини әскәртти.

у йәнә, буниң үчүн инсанпәрвәрлик нуқтисидин урушни вақитлиқ тохтитишни вә инсанпәрвәрлик каридори ечиш керәкликиниму тәкитлиди.

у йапонийәниң G7 дөләтлири вә хәлқаралиқ тәшкилатлар билән бирликтә районда инсаний вәзийәтниң йахшилиниши үчүн дипломатик тиришчанлиқлирини давамлаштуридиғанлиқини қәйт қилди.

канада һөкүмитиму исираилийәни ийордан дәрйасиниң ғәрбий қирғиқида йәһудий көчмәнләрниң пәләстинликләргә қиливатқан зораванлиқлирини тохтитиш үчүн дәрһал һәрикәткә өтүшкә чақирди.

канада ташқи ишлар министирлиқи йазма байанат елан қилип, ийордан дәрйасиниң ғәрбий қирғиқида пәләстинликләрниң мәҗбурий йурт-маканлиридин көчүрүлгәнликидин чоңқур әндишә қилиниватқанлиқини билдүрди.

байанатта мундақ дейилди:

«канада исираилийә һөкүмитини йәһудий көчмәнлириниң зораванлиқини тохтитишқа, пәләстин хәлқиниң қоғдилиши үчүн дәрһал һәрикәткә өтүшкә чақириду.»

америка кеңәш палатасиниң орегон иштатидин сайланған демократчи әзаси җеф мерклейму ғәззәдә уруш тохтитишни чақириқ қилип: «ғәззәдә пуқраларниң өлүми кишини чөчүтидиған сәвийәдә ешиватқан бир вақитта, орегон хәлқини өз ичигә алған нурғун америка хәлқи қирғинчилиқниң тохтитилиши үчүн авазини йуқири көтүрди. мәнму бу пикиргә қошулимән вә бу сәвәбтин тәрәпләрни уруш тохтитишқа чақиримән» деди.

һамасниң һәрбий қанити болған қассам биригадилири 7-өктәбир (2023) «әқса топани» намлиқ кәң көләмлик һуҗум башлиғанлиқини елан қилған иди.

исираилийә армийәсиму буниңға җавабән «төмүр қилич һәрикити» ни башлиғанлиқини елан қилған иди.

күнсери кәскинләшкән тоқунушларда, 13 миңдин артуқ пәләстинлик җенидин айрилди. буларниң ичидә көпинчиси кичик балилар.