baydin amérikaning xitay bilen téximu yaxshi munasiwet ornitishni xalaydighanliqini éytti

türkiye awazi radyosi xewiri: shi jinpingning asiya-tinch okyan rayoni iqtisadiy hemkarliq munbiri bashliqlar yighini dairiside, bügün (15-noyabir) pilanlanghan amérika pirézidénti jo baydin bilen uchrishishi metbuatlar teripdin yéqindin közitilmekte.

ikki derijidin tashqiri chong dölet otturisidiki sürkilish küchiyiwatqan bir peytte ötküzülidighan amérika pirézidénti we xitay reisining uchrishishi, her ikki rehberning mushu bir yil (2023) ichidiki ikkinchi qétimliq yüz turane körüshüshi hésablinidu.

dunya iqtisadining %60 ni teshkil qilidighan 21 döletni bir yerge jem qilidighan munber yighinidin ilgiri tereplerdin mötidil uchurlar kélishke bashlidi.

jo baydin tünügün (14- noyabir) amérikaning xitaydin yiraqlishishqa tirishmighanliqini, del eksiche téximu yaxshi munasiwet ornitishni xalaydighanliqini éytti.

baydin bu bayanatini amérikaning sherqidiki paytext washingtondin gherbidiki san firansisko shehirige yolgha chiqishtin sel burun aqsarayda élan qildi.

baydin yolgha chiqishtin ilgiri chaqirghan muxbirlarni kütüwélish yighinida, xitay rehbiri bilen körüshüshning meqsiti toghrisidiki soalgha jawab bérip: «normal alaqe sewiyesige qaytish؛ her qandaq bir kirizis mezgilide téléfonni élipla özara paranglishalaydighan bolush» dédi.

yuqiri derijilik mesullardin kelgen we mueyyenleshmigen uchurlargha asaslanghanda, ikki rehber san firansiskoning wodsayd yézisidiki bir tarixiy yéza öy muzéyi bolghan filoli éstétte körüshidiken.

yene bir amérika emeldari baydin bilen shining «herbiy déngiz ishliri meslihetlishish kélishimi» dairiside muzakirelerni qayta bashlash kélishimini élan qilishining kütülüwatqanliqini jezmleshtürdi.

bu kélishim, amérika we xitay déngiz armiyesi shundaqla hawa armiyesi otturisidiki özara uchur - alaqini yaxshilash arqiliq hawa we déngizdiki bixeterlikni ashurushni meqset qilidu.

uzundin buyan murekkeplishiwatqan amérika-xitay munasiwiti, ötken yili (2022) amérikaning yuqiri téxnikiliq mehsulatlargha qarita yolgha qoyghan yéngi éksport kontrolluqini kücheytish tedbirliri we xitayning buninggha bildürgen naraziliqidin kéyin éghir bésimgha duch kelgen idi.

buningdin bashqa yene, pirézidént jo baydinning féwral (2023) da amérika zéminida uchqan xitayning jasusluq sharini étip chüshürüsh buyruqini bérishi we teywen rehbiri sey yingwénning yil béshidiki amérika ziyariti, ikki dölet munasiwetlirini murekkepleshtürgen özgirishler bolup qalghan idi.