israiliye 7-öktebirdin buyan ghezze hujumigha bir atom bombisining küchige teng partlatquch ishletti

türkiye awazi radiyosi xewiri: ghezzediki hamas hökümitining axbarat ishxanisi israiliyening hujumliri heqqide bayanat élan qildi.

bayanatta: «israiliye 7-öktebirdin buyan ghezze hujumigha 12 ming tonnidin artuq partlatquch  ishletti. ghezzening her bir kiwadrat kilométir yérige texminen 33 tonna bomba chüshti» déyildi.

bayanatta ghezzege chüshken omumiy partlatquchning küchi terepke diqqetlerni tartip, israiliyening hazirghiche ghezzege atqan bombilirining omumiy küchi amérikaning ikkinchi dunya urushida yaponiyening xiroshima shehirige tashlighan atom bombisining küchige teng kélidighanliqi tekitlendi.

bayanatta, ghezze rayonidiki öylerning yérimigha teng kélidighan 183 ming yürüshtin artuq öyning weyran qilinghanliqi, 28 ming yürüsh öyning pütünley yéqilip chüshkenliki yaki olturghili bolmaydighan halgha kélip qalghanliqi uqturuldi.

israiliyening hujumi sewebidin jénidin ayrilghanlargha alaqidar sanliq melumtidimu, 7-öktebirdin buyan ghezze rayonida 2 ming 360 kichik bala we 1421 ayalni qoshqanda, jemiy 5 ming 791 kishining jénidin ayrilghanliqi, 16 ming 297 kishining yarilanghanliqi bildürüldi.

ibadetxanilarghimu hujum qilinghanliqi uqturulghan bayanatta yene, israiliyening hujumida fosfor bombisi qatarliq xelqarada cheklengen bombilarning ishlitilgenliki we «ölgenlerning bedinide köygen we érigen ezalarning bayqalghanliqii» tekitlendi.

bayanatta, ghezze rayonigha yardem bérishning muhimliqi tekitlendi we refah chégra éghizini her waqit ochuq tutush kérekliki, yardem we yéqilghuning cheklenmesliki shundaqla  yarilanghanlarning ghezze sirtida dawalinishighimu yol qoyush lazimliqi chaqiriq qilindi.