imranxan rawalpindidiki türmige yötkeldi
pakistanning sabiq bash ministiri imranxan tutup turuluwatqan attok türmisidin paytext islamabadqa qoshna rawalpindigha jaylashqan adiyala türmisige yötkeldi.
türkiye awazi radiyosi xewiri: pakistan taratquliridiki xewerlerde qeyt qilinishiche, islamabad aliy sot mehkimisi imranxanning adwokatlirining telipi boyiche uni islamabadqa qoshna rawalpindidiki türmige yötkeshni qarar qilghan. imranxan oq ötmes aptomobilda attok türmisidin rawalpindidiki adiyala türmisige apirilghan.
islamabad aliy sot mehkimisi imranxan bilen sabiq tashqi ishlar ministiri shah mehmut qureyshining «dölet mexpiyetlikini ashkarilash» jinayiti bilen eyiblengenliki sewebidin tutup turulush waqtini 10-öktebir (2023) giche 14 kün uzartti.
pakistan saqchiliri 5-awghust (2023) imranxanni lahor shehiridiki öyide qolgha alghan idi.
imranxan üstidin chiqirilghan üch yilliq qamaq jazasi 29-awghust (2023) kéchiktürülgenliki sewebidin kapalet bilen qoyup bérilgen idi. emma u, shu künning etisi teptish mehkimisining telipi boyiche «dölet mexpiyetlikini ashkarilash» jinayiti bilen eyiblinip qaytidin tutulghan idi.
sabiq tashqi ishlar ministiri qureyshimu oxshash jinayet bilen eyiblinip 19-awghust islamabadtiki öyide qolgha élinghan idi.
