хитай русийә билән һәрбий һәмкарлиқларни тәрәққий қилдурушни халайдиғанлиқидин бешарәт бәрди
хитай дөләт мудапиә министири ли шаңфу русийә билән армийәләр оттурисида өзара һәмкарлиқларни тәрәққий қилдурушни халайдиғанлиқлирини билдүрди.
түркийә авази радийоси хәвири: хитайниң «йәр шари вақти гезити» ниң хәвиридә билдүрүлишичә, ли фамилилик русийәдә өткүзүлгән 11-нөвәтлик москва бихәтәрлик конферансида сөз қилғанда, хитай-русийә һәрбий мунасивәтлириниң «иттипақ қурмаслиқ», «қутуплашмаслиқ» вә «үчинчи тәрәпләрни нишан қилмаслиқ» пиринсиплириға тайинидиғанлиқини؛ бу нуқтидин ейтқанда, дөләтләр арисидики һәрбий мунасивәтләргә үлгә болалайдиғанлиқини тәкитлигән.
у: «икки дөләт армийәлири оттурисида қойуп алақә бар. бу зийарәттә русийәлик мәнсәпдешим сергей шойгу билән йеңи һәмкарлиқ имканийәтлирини муһакимә қилишни халаймиз» деди.
у русийә-украина уруши сәвәбидин ғәрб дунйаси билән йирикчиликләр давамлишиватқан бир вақитта, хитай-русийә һәрбий һәмкарлиқиға қаритилған тәнқидләр үстидә тохтилип: «бейҗиң билән русийә оттурисидики очуқ-ашкара болған һәрбий һәмкарлиқиниң дунйа тинчлиқиға вә муқимлиқиға төһпә қошидиғанлиқиға ишинимән» деди.
у ахирида, хитай билән русийә әза болған шаңхәй һәмкарлиқ тәшкилати рамкисида бихәтәрлик саһәсидики хизмәтләрни күчәйтишкә, тәшкилатниң йеңи әзалири һесаблинидиған иран вә беларусийә билән мудапиә һәмкарлиқлирини техиму чоңқурлаштурушқа тәййар икәнликлирини билдүрди.
