кулеба: әрдоған ашлиқ келишиминиң әслигә келишигә капаләтлик қилалайду
украина ташқи ишлар министири димитро кулеба җумһур рәис рәҗәп таййип әрдоғанниң қарадеңиз ашлиқ каридори келишиминиң әслигә келишигә капаләтлик қилалайдиғанлиқини ейтти.
түркийә авази радийоси хәвири: украина ташқи ишлар министири кулеба италийәниң «кориерре делла сера» гезитиниң қарадеңиз ашлиқ каридори келишими тоғрисидики «әрдоған ашлиқ келишиминиң қайтидин күчкә игә болушиға капаләтлик қилаларму?» дегән соалиға җаваб берип: «шундақ, мениңчә у (җумһур рәис әрдоған) буни қилалайду. биз түркийә дипломатлириниң руслар билән һәмкарлишип хизмәт қиливатқанлиқини билимиз. бу җәрйанда, биз қарадеңиздин өтмәй туруп ашлиқ вә башқа мәһсулатларни експорт қилишниң йоллирини бәрпа қиливатимиз» деди.
2022- йили 24 - феврал башланған русийә- украина урушиниң дунйа ашлиқ баһасиға көрситидиған тәсирини азайтиш үчүн, бирләшкән дөләтләр тәшкилати (б д т), русийә, түркийә вә украина 2022 – йили 22 – ийул истанбулда сөһбәт өткүзүп, қарадеңиз ашлиқ каридори келишимигә имза қойғаниди.
русийә пирезидентлиқ мәһкимиси — киремил байанатчиси димирий песков муддити тошқан келишим тоғрисида 17 - ийул байанат елан қилип: «ашлиқ каридори келишими рәсмий ахирлашти, йәни тохтитилди. русийә мунасивәтлик шәртләр орунланған һаман дәрһал ашлиқ келишимигә қайтип келиду. келишимниң русийәгә мунасивәтлик қисми орунланмиди» дегәниди.
