җәнубий корейә билән нато пүтүшти
җәнубий корейә пирезиденти йон сук йеол билән шималий атлантик әһди тәшкилати баш катипи җенс столтенберг терроризмға қарши күрәш һәм тор мудапиәси қатарлиқ 11 саһәдә һәмкарлиқни күчәйтиш келишим лайиһәсини имзалиди.
түркийә авази радийоси хәвири: йонхап агентлииқиниң хәвиригә қариғанда, җәнубий корейә пирезидент мәһкимиси ишханиси тәрипидин елан қилинған байанатта, җәнубий корейә пирезиденти йон сукол билән шималий атлантик әһди тәшкилати баш катипи җенс столтенбергниң литванийәниң пайтәхти вилнйуста чақирилған шималий атлантик әһди тәшкилати башлиқлар йиғинида бир йәргә җәм болғанлиқи билдүрүлгән.
учришишта, икки рәһбәрниң нато билән җәнубий корейә оттурисидики һәмкарлиқниң даирисини кеңәйтиш үчүн терроризмға қарши күрәш, тор мудапиәси, йадро қораллириниң кәң тарқилишиға тақабил турушни өз ичигә алған 11 саһәдики һәмкарлиқни күчәйтиш мәқситидә йеңи һәмкарлиқларни орнитиш келишим лайиһәсини имзалиғанлиқи әскәртилгән.
байанатта тәкитлинишичә, һәмкарлиқ даирисииниң кеңийишигә әгишип, җәнубий корейә шималий атлантик әһди тәшкилатиниң терроризмға қарши күрәш маневирлириға қатнишидикән, җәнубий корейә билән шималий атлантик әһди тәшкилати оттурисида мәслиһәт кеңиши орни тәсис қилинидикән. һинди- тинч окйан райониниң бихәтәрликигә капаләтлик қилиш, җәнубий корейәниң йапонийә, австралийә, йеңи зеландийә вә шималий атлантик әһди тәшкилати билән болған һәмкарлиқни күчәйтиши һәрқандақ вақиттикидинму муһим икән.
шималий атлантик әһди тәшкилати билән җәнубий корейә оттурисида сийасий вә һәрбий мәсилиләр музакирә қилинидикән, алий дәриҗилик рәһбәрләр учришишлири елип берилидикән. шималий атлантик әһди тәшкилатиниң технологийә вә тор мудапиәсини тәрәққий қилдурушқа мунасивәтлик алий дәриҗилик рәһбәрләр йиғинлириға җәнубий корейәму қатнишидикән.
байанатта, хәлқара җәмийәтниң шималий корейәниң қанунсиз йадро қораллири вә башқурулидиған бомба иғвагәрчиликигә қарши күчлүк инкас қайтуруши керәклики тәкитләнгән, шундақла шималий атлантик әһди тәшкилати җәнубий корейәни давамлиқ қоллашқа чақириқ қилинған.
байанатта йәнә, столтенбергниң җәнубий корийәниң шималий атлантик әһди тәшкилати үчүн муһим иттипақдаш дөләт икәнликини тәкитлигәнлики һәмдә униң сеул һөкүмитиниң корийә йерим арилиниң тинчлиқи вә муқимлиқиға капаләтлик қилиш йолида көрситиватқан тиришчанлиқлирини қоллаватқанлиқи қәйт қилинған.
