гутеррес: пуқраларни нишан қилидиған барлиқ зораванлиқ  һәрикәтлирини әйибләймән

түркийә авази радийоси хәвири:  бирләшкән дөләтләр тәшкилати баш катипи антонйо гутеррес ишғалийәт астидики ийордан дәрйасиниң ғәрбий қирғиқидики шәһәр җениндики өзгиришләрдин қаттиқ әндишә қиливатқанлиқини тәкитләп мундақ деди: «пуқраларни нишан қилидиған барлиқ зораванлиқ һәрикәтлирини қаттиқ әйибләймән.»

гутеррес бирләшкән дөләтләр тәшкилатиниң америка қошма иштатлириниң нйу йорк шәһиридики бинасида мухбирларниң соаллириға җаваб бәрди.

баш катип гутеррес анадолу агентлиқи мухбириниң «байанлириңиздики әйиблишиңиз исраилийәни нишан қиламду?»  дегән соалиға мундақ җаваб бәрди: «әйибләшләр чекидин ашқан барлиқ зораванлиқ һәрикәтлирини өз ичигә алиду. бу нуқтидин елип ейтқанда, исраилийә чекидин ашқан зораванлиқни қолланди.»

гутеррес исраилийәниң адәм сани интайин көп җенин мусапирлар лагериға һава вә қуруқлуқтин қилған һуҗумлириниң йеқинқи йиллардин буйанқи ийордан дәрйасиниң ғәрбий қирғиқидики әң еғир зораванлиқ һәрикәтлирини тәшкил қилидиғанлиқини, буниң пуқраларға болған тәсириниң интайин еғир икәнликини қәйт қилди.

исраилийәниң һуҗумлирида дохтурханилар, мәктәпләр, су вә ток ул әслиһәлириниң зийанға учриғанлиқини әскәрткән гутеррес еһтийаҗлиқ кишиләрниң теббий йардәмләргә еришишиниң тосқунлуққа учриғанлиқини тәкитләп мундақ деди: «исраилийәни йәнә бир қетим хәлқара қанунға асасән өз мәсулийитини ада қилишқа, соғуққан болушқа чақиримән. дәрвәқә, исраилийә мувапиқ күч ишлитиши вә инсанларниң һайатини қоғдиши керәк.»

гутеррес бихәтәрлик һәрикәтлиридә һава һуҗумлириниң елип берилмаслиқи керәкликини әскәртип мундақ деди: «исраилийәниң бихәтәрлик мәсилилирини чүшинимән. шуниң билән бир вақитта, шуни алаһидә тәкитләп өтимәнки, җиддийчиликни әвҗ алдуруветиш һәл қилиш чариси әмәс. дәрвәқә, зораванлиқ радикаллишишни вә техиму көп қан төкүлүшни кәлтүрүп чиқириду.»

баш катип гутеррес пуқраларни нишан қилидиған барлиқ зораванлиқ вә террорлуқ һәрикәтлирини қаттиқ әйибләйдиғанлиқиниму сөзлиригә илавә қилди.