русийә билән вагнер бихәтәрлик ширкити оттурисида киризис йүз бәрди
русийә бихәтәрлик (йалланма әскәрләр) ширкити «вагнер»ниң қурғучиси йевгений пригоҗин русийә армийәсини вагнерға һуҗум қилиш билән әйибләп, өзлириниң инкас қайтуруш үчүн һәрикәткә өткәнликини билдүрди.
түркийә авази радийоси хәвири: пригоҗин өзиниң телеграмма суписидики қанилида байанат елан қилип, русийә армийәсиниң вагнерниң газармилириға һуҗум қилип, нурғун вагнер әскирини өлтүргәнликини илгири сүрди.
у вагнерниң буниңға җаваб қайтуридиғанлиқини тәкитләп: «бүгүн бизниң адәмлиримизни өлтүргән вә онмиңлиған русийә әскириниң өлүшини кәлтүрүп чиқарғанлар җазалиниду. алдимизға чиққан һәр қандақ адәмни тәһдит дәп қарап, дәрһал йоқитимиз. бизниң йолимизни торашқа урунмаңлар. биз башлиған ишимизни түгәткәндин кейин, алдинқи сәпкә қайтип, вәтинимизни қоғдашни давамлаштуримиз» деди.
русийә дөләт мудапиә министирлиқи байанат елан қилип, иҗтимаий таратқулардики вагнер газармилириға мунасивәтлик икәнлики илгири сүрүлгән көрүнүшләрниң «сахта» вә «иғвагәрчилик»тин ибарәт икәнликини билдүрди؛ байанатта: «пиригоҗин вә униң қоллиғучилириниң қилғини қораллиқ топилаңдур» дейилди.
русийә дөләтлик террорлуққа қарши туруш комитетиму бу һәқтә байанат елан қилип, пригоҗинниң сөзлириниң тоғра әмәслики әскәртти вә «федератсийә бихәтәрлик идариси қораллиқ топилаң чақириқи елан қилғанлар үстидин җинайи ишлар әрзнамиси сунди. биз бу қанунсиз һәрикәтләргә дәрһал хатимә берилишини тәләп қилимиз» дегәнләрни қәйт қилди.
киризис сәвәбидин русийәниң украина чеграсиға йеқин районлирида бихәтәрлик тәдбирлири күчәйтилди, йевгений пригоҗин башчилиқидики вагнер гурупписи ростоф-на донудики русийә җәнуб һәрбий район қоманданлиқ мәркизини қоршивалди.
пригоҗин өзлириниң ростовдики һәрбий айродурумни өз ичигә алған һәрбий орунларниң контроллуқини қоллириға алғанлиқлирини билдүрди.
русийә федератсийә бихәтәрлик идариси вагнер әзалирини хаталиқ өткүзмәсликкә, пригоҗинниң җинайәт характеридики буйруқлириға бойсунмай, уни дәрһал назарәт астиға елишқа чақирди.
