гиринфилид: украиналиқ мусапирлар саниниң көпийип кетишиниң җавабкари русийә
америка қошма иштатлириниң бирләшкән дөләтләр тәшкилати (б д т)да турушлуқ даимий вәкили линда томас-гиринфилид украинадики уруш сәвәбидин мусапирларниң саниниң «рекорт» дәриҗидә ешип кетишиниң җавабкариниң русийә икәнликини илгири сүрди.
түркийә авази радийоси хәвири: гиринфелд (түнүгүн) дунйа мусапирлар күни мунасивити билән байанат елан қилип, 6- ийунда украинаниң җәнубиға җайлашқан херсон райониниң русийәниң контроллуқидики каховка тосмиси билән су електр истансисиниң бомбардиман қилинишидин кейин йүз бәргән кәлкүн сәвәбидин нурғун кишиниң җиддий йардәмгә моһтаҗ һалға чүшүп қалғанлиқини оттуриға қойди вә сөзини давамлаштуруп: «русийә пирезиденти виладимир путин украинаға ачқан адаләтсиз уруш, мусапирлар саниниң рекорт дәриҗидә ешип кетишиниң баш җавабкари» дегәнләрни қәйт қилди.
судандики тоқунушларниңму коллектип көчүшләрни пәйда қилғанлиқини тилға алған гиринфилид, уруш, сийасий муқимсизлиқ вә тәбиий апәт қатарлиқ амилларниң нурғун кишиләрни мәҗбурий көчүшкә зорлиғанлиқини тәкитлиди.
у дунйаниң «мисли көрүлмигән» дәриҗидә йәр шариви киризисиға дуч келиватқанлиқини әскәрткәндин кейин: «һечқандақ бир дөләтниң йалғуз бешиға йурт – маканлиридин айрилип қалған милйонларчә сәргәрданниң мәсилисини һәл қилалмайдиғанлиқи؛ буни һәл қилиш үчүн чоқум дунйави һәмкарлиқ орнитишниң зөрүрлүкини» тилға елип өтти.
