yawropolning 2023-yilliq térrorizm doklatida p k k ning yawropadiki paaliyetlirige keng orun bérildi
yawropa saqchi teshkilati — yawropol, bölgünchi térrorluq teshkilati — p k k ning yawropada teshwiqat ishlirida ishlitish üchün pul toplashni dawamlashturuwatqanliqini bildürdi.
türkiye awazi radiyosi xewiri: yawropolning her yili qerellik élan qilinidighan «2023 - yilliq yawropa ittipaqi térrorluq weziyiti we yüzlinish» namliq doklatida, térrorluq teshkilati — p k k ning yawropada intayin aktip ikenliki, térrorluq teshkilatining rehberlik apparati, eza toplash we teshwiqat jehettiki meblegh éhtiyajini qandurush üchün, yawropa ittipaqigha eza döletlerdin baza süpitide paydiliniwatqanliqi otturigha qoyuldi.
yawropadiki ashqun solchil idiyediki kishilerning toqunush rayonlirida p k k térrorluq teshkilatigha qétilghanliqigha isharet qilinghan doklatta, térrorluq teshkilati sepliride urush qilip qaytip kelgen bu kishilerning yawropa ittipaqigha eza döletler üchün tehdit élip kelgenliki tekitlendi.
p k k ning yawropa ittipaqidiki ashqun solchil teshkilatlar we hökümetsiz guruppilar bilen qoyuq munasiwiti barliqi bayan qilinghan doklatta, bu munasiwetler dairiside, süriyening y p g unsurliri turuwatqan rayonlirida ashqun solchilar bilen hökümetsiz guruppilarning qoral ishlitish meshiqliridin ötküzülgenliki qeyt qilindi.
y p g ning türkiye teripidin p k k ning gumashtisi dep qarilidighanliqi eskertilgen doklatta, térrorluq teshkilatining yawropa ittipaqi döletliridin toplighan mebleghni süriyediki y p g unsurlirini qollashqa ishletkenliki toghrisidiki uchurlargha orun bérildi.
p k k ning «seperwerlik» dégen nam astidiki pul toplash paaliyetliri arqiliq yawropa ittipaqi tewelikide zor miqdarda mebleghke érishkenliki otturigha qoyulghan doklatta, térrorluq teshkilatining yene yawropa ittipaqi tewelikide zeherlik chékimlik sodisi bilen shughullinish we etkeschilik qilmishliri arqiliq kirim yaratqanliqi tekitlendi.
doklatta, p k k ning térrorluq teshkilati kattibéshi abdullah öjalanning qoyup bérilishi we p k k ning térrorluq teshkilatliri tizimlikidin chiqiriwétilishini qolgha keltürüsh üchün lobichiliq bilen shughulliniwatqanliqi qeyt qilindi.
2022- yili térrorluqning yawropa ittipaqigha eza döletlerge éghir tehdit élip kelgenliki tilgha élinghan doklatta yene, ötken yili 93 nepiri firansiyede, 46 nepiri ispaniyede, 30 nepiri gérmaniyede we 22 nepiri bélgiyede bolup, yawropa ittipaqigha eza döletlerde jemiy 380 kishining térrorluq gumani nazaret astigha élinghanliqi, ijtimaiy taratqu we intérnéttin térrorluq teshkilatliri teripidin térrorluq teshwiqati we ajiz kishilerni öz sépige jelp qilish üchün paydilanghanliqiy alahide eskertildi.
