йәмәндә май ейидила тәхминән 4000 мина тазиланди
йәмәндә май ейидила тәхминән 4000 мина вә партилимиған бомбиларниң тазиланғанлиқи билдүрүлди.
түркийә авази радийоси хәвири: сәуди әрәбистан башлиған «мина тазилаш лайиһәси» <MASAM> май ейидики паалийәт доклатини елан қилди.
доклатта, йәмәндә иранниң қоллиши астидики хусийлар тәрипидин олтурақ район вә йолларға орунлаштурулған мина вә бомбиларни тазилаш хизмәтлириниң давамлишиватқанлиқи уқтурулди.
майда ейидики тазилаш хизмәтлири даирисидә йәмәнниң һәрқайси районлирида тәхминән 1000 квадрат километир җайда 3989 мина вә бомбиларниң тазиланғанлиқи қайт қилинған доклатта йәнә, тазилаш хизмәтлири башланған 2018-йилдин буйан 400 миң 70 мина вә бомбиларниң тазиланғанлиқи билдүрүлди.
сәуди әрәбистан башлиған «мина тазилаш лайиһәси» <MASAM> даирисидә, йәмәндики 46 милйон 439 миң 132 квадрат метир көләмдики җайниң партилатқучлардин тазиланғанлиқи доклат қилинди.
йәмәндә, иранниң қоллиши астидики хусийлар 2014-йили синтәбирдин буйан пайтәхт сана вә бир қисим районларни алқиниға киргүзүвалған болуп, сәуди әрәбистан башчилиқидики бирләшмә қисимлар 2015-йили март ейидин бери хусийларға қарши йәмән һөкүмитигә йардәм бәрмәктә.
йәмән һөкүмити вә кишилик һоқуқ тәшкилатлириниң доклатлириға асасланғанда, хусийлар ички уруш башланған 2014-йилидин буйан мәмликәт миқйасида 2 милйонға йеқин мина көмгән. бу миналар миңлиған пуқраларниң қаза қилишиға йаки йаридар болушиға сәвәб болған.
кишилик һоқуқ тәшкилатлириниң мөлчәрлишичә, йәмәндә көпинчиси айаллар вә балилар болуп җәмий 8000 дин артуқ киши миналарниң зийанкәшликигә учриған.
