столтенберг: натониң косовуға қошумчә әскәр әвәтиши сийасий чаридин ваз кәчкәнликини көрсәтмәйду

түркийә авази радийоси хәвири: баш катип йенс столтенберг норвегийәниң пайтәхти ослода өткүзүлгән натониң бирәсмий ташқи ишлар министирлири йиғини башлиништин илгири мухбирларниң соаллириға җаваб бәрди.

у натониң косовуға қошумчә 700 әскәр әвәтиши вә бир баталийон әскәрни тәййар һаләткә кәлтүрүшиниң, натониң тоқунушларниң йавропаға кеңийип кетишидин әндишә қиливатқанлиқини көрситип – көрсәтмәйдиғанлиқи тоғрисидики соалға җаваб берип: «бу натониң сийасий һәл қилиш чарисидин ваз кәчкәнликидин дерәк бәрмәйду» деди.

йенс столтенберг косовуниң шималидики җиддийчиликни пәсәйтиш үчүн әскәр әвәткәнликлирини тилға елип, вәзийәт йаманлишип кәткән тәқдирдә вәзийәтни контрол қилиш үчүн бир баталийон әскәрниң тәййар һаләттә туруватқанлиқини қайта тәкитлиди.

йәнә бир тәрәптин, косовудики әң чоң серб партийәси — «сербийә тизимлики» ниң рәиси горан ракич, тәләплиригә асасән натониң косовуда турушлуқ тинчлиқ сақлаш қисимлириниң косовуниң шималидики звечандики йәнә бәш орунға әскәр орунлаштурғанлиқини елан қилди.

ракич вәзийәтниң техиму җиддийчлишип кетишиниң алдини елиш үчүн, районниң охшаш болмиған җайлириға әскәр орунлаштуруш тәлипигә косову тинчлиқ сақлаш қисимлириниң иҗабий җаваб қайтурғанлиқини тәкитлиди.

у косову тинчлиқ сақлаш қисимлириниң тинч һаләттә намайиш қиливатқан кишиләрни қоғдаш үчүн районда вәзипә өтәватқанлиқини сөзлиригә илавә қилди.