pakistanda yüz bergen partlashta 12 saqchi qaza qildi

türkiye awazi radiyosi xewiri: pakistan taratqulirining saqchi we sehiye organlirini menbe körsitip xewer qilishiche, pakistan térrorizmgha qarshi küresh qisimliri binasining oq - dora iskilatida partlash yüz bergen.

pakistan saqchi dairilirining bildürüshiche, shiddetlik partlash netijiside saqchixana binasi pütünley weyran bolghan.

 deslepki melumatlargha qarighanda, partlashta kem dégende 12 saqchi qaza qilghan, 60 tin artuq kishi yarilanghan.

shu jay waqti etigen saet 8.20 etrapida yüz bergen partlash deslepte «adem bomba hujumi» dep qaralghan.

térrorizmgha qarshi küresh qisimlirining mesuli shepket abbas bu heqte élan qilghan bayanatida, «deslepki tekshürüshimizge asasen, partlashning adem bomba hujumi yaki bomba hujumi emeslikini éniqlap chiqtuq»  dégen.

abbas bu weqening oq - dora dora iskilatidiki partlashtin kélip chiqqan bolushi mumkinlikini bayan qilghan.

pakistan térrorizmgha qarshi küresh qisimlirining mesulliridin xalid suheyl bolsa weqening tekshürülüwatqanliqini, partlashta saqchixana binasining pütünley weyran bolghanliqini we etraptiki bezi binalarning ziyangha uchrighanliqini éytqan.

alaqidar tarmaqlarning bildürüshiche, partlashta yarilanghanlardin bezilirining ehwali éghir bolup, qaza qilghanlar sanining köpiyip kétish xewpi bar iken.

partilashtin kéyin, pakistan taratquliri bezi saqchi menbelirige asasen bu weqening adem bomba hujumi ikenlikini bildürgenidi.

pakistan bash ministiri shahbaz shérif bu heqte élan qilghan bayanatida, mundaq  dégenidi: «xelqimiz shéhit bolup ketken saqchilirimiz üchün matem tutuwatidu. térrorizmni üzül – késil yoqitishqa wede bérimen.»