б д т русийәниң беларусийәгә йадро қорали орунлаштуруш пиланиға инкас қайтурди
бирләшкән дөләтләр тәшкилати (б д т) байанатчиси русийәниң беларусийәгә тактикилиқ йадро қораллирини орунлаштуруш пилани тоғрисида тохталди.
түркийә авази радийоси хәвири: бирләшкән дөләтләр тәшкилати (б д т) байанатчиси русийәниң беларусийәгә тактикилиқ йадро қораллирини орунлаштуруш пилани тоғрисида тохтилип, барлиқ әза дөләтләрниң йадро қораллириниң кеңийишиниң алдини елиш шәртнамисигә әмәл қилиши керәкликини тәкитлиди.
б д т баш катипиниң байанатчиси истефан дуҗаррик күндилик мухбирларни күтүвелиш йиғинида сөз қилип, йадро қораллириға алақидар җиддийчиликләрниң күчийип кетишиниң кишини әндишигә салидиғанлиқини ейтти.
у йадро хәвпиниң интайин йуқири икәнликигә ишарәт қилған һалда, җиддийчиликни уйғайтиветидиған һәр хил хата чот йаки һәрикәтләрдин сақлиниш керәкликини тилға елип: «барлиқ әза дөләтләр йадро қораллириниң кеңийип кетишиниң алдини елиш шәртнамисигә әмәл қилиши керәк. улар шәртнаминиң мәсулийәт вә мәҗбурийитини ада қилиши лазим» деди.
дуҗаррик украинаниң б д т хәвпсизлик кеңишиниң җиддий йиғин чақириши һәққидики тәлипи тоғрисида тохтилип, йиғинниң бу һәптә ичидә ечилидиғанлиқини билдүрди.
русийә пирезиденти виладимир путин 25- март москваниң беларусийәгә тактикилиқ йадро қораллирини орунлаштуридиғанлиқини билдүрүп: «биз буни йадро қораллириниң кеңийип кетишиниң алдини елиш тоғрисидики хәлқаралиқ мәҗбурийитимизгә хилаплиқ қилмастин орунлаштуримиз» дегәниди.
шималий атлантик әһди тәшкилати – нато билән йавропа иттипақи русийәниң бу қарариға «мәсулийәтсизлик» дәп баһа бәргәниди.
украина ташқи ишлар министирлиқиму бу темини музакирә қилиш үчүн, б д т хәвпсизлик кеңишиниң пәвқуладдә йиғин чақиришини тәләп қилғаниди.
