biraziliyede yuqiri derijilik emeldarlargha suyiqest qilishni pilanlighan jinayi teshkilat qolgha chüshti
biraziliyede yuqiri derijilik siyasionlar we emeldarlarni qestlep öltürüshni pilanlighan jinayi teshkilat bitchit qilindi.
türkiye awazi radiyosi xewiri: biraziliye metbuatliridiki xewerlerge asaslanghanda, fédératip saqchilar bu chong jinayi guruhqa qarshi besh ölkide teng birla waqitta heriket élip barghan.
edliye ministiri flawiyo dino tiwittér hésabidiki bayanatida, 120 saqchining jinayi teshkilatqa tewe öy we binalargha bésip kirip tekshürüsh élip barghanliqini bildürüp, «bir qanche hökümet emeldarlirini qestlep öltürüsh pilani qolgha chüshürüldi (kéngesh palata ezasi we mupettishnimu öz ichige alghan) bu pilanlar tekshürülüp zörür tedbirler élindi» dédi.
biraziliye pirézidénti luyiz inakiyo lula da silwa we sabiq edliye ministiri sérgiyo moroningmu qestlep öltürüsh pilanining ichide ikenliki, bu jinayi guruhqa qarshi heriketning san pawlo we parana ölkisidin bashqa yene rondoniye, biraziliye we moto grosso do sulda élip bérilghanliqi uqturuldi.
bu qétimqi heriketning «PCC» namliq biraziliye we jenubiy amérikidiki eng chong zeherlik chékimlik etkeschi guruhigha qarshi élip bérilghanliqi, paragwayliq teptish emeldari marsélo péchchining öltürülüshidimu «PCC» ning roli barliqi bildürüldi.
«PCC» guruhigha qarashliq qoralliq unsurlarning sabiq edliye ministiri moroning öyige yéqin déhqanchiliq meydanini ijare alghanliqi we uzundin buyan uni razwédka qilghanliqi uqturuldi.
