филиппин хитайға наразилиқ билдүрди
хитай һәрбий парахотиниң җәнубий хитай деңизидики филиппин деңиз қирғиқи муһапизәт парахотиниң хадимлириға һәрбий лазер нури арқилиқ зийан йәткүзгәнлики илгири сүрүлди.
түркийә авази радийоси хәвири: филиппин деңиз қирғиқи муһапизәт әтритиниң билдүрүшичә, хитайға тәвә деңиз қирғиқи муһапизәт парахоти филиппин деңиз қирғиқи муһапизәт парахотиға лазер нури арқилиқ һуҗум қилған.
байанатта илгири сүрүлүшичә, лазер нури бир қисим парахот хадимлириниң вақитлиқ қариғу болуп қелишиға сәвәб болған.
байанатта, бу һуҗум маниланиң игилик һоқуқиға дәхли-тәруз қилғанлиқ һесаблинидиғанлиқи әскәртилип мундақ дейилгән:
«хитайниң, һәрбий хадимлиримизға йемәклик вә әшйаларни тошуватқан парахотларға қәстән тосалғу болуши, филиппинниң <ғәрбий филиппин деңизи> дики игилик һоқуқини очуқ-ашкара һалда дәпсәндә қилғанлиқ болиду.»
филиппин деңиз қирғиқи муһапизәт әтритиниң мәсули коммодоре арманд балило хитайниң илгириму ихтилаплиқ районда филиппин деңиз қирғиқи муһапизәт парахотини тосуш үчүн һәр хил паалийәтләрни елип барғанлиқини, әмма тунҗи қетим лазер нури ишлитип, парахот хадимлириға җисмани җәһәттин зийан салғанлиқини қәйт қилди.
игилинишичә, хитай җәнубий деңизниң %80 тин көпирәкиниң игилик һоқуқиниң өзигә тәәллуқ икәнликини илгири сүридикән.
су асти байлиқлири мол болған район филиппинни өз ичигә алған вейтнам, бируней вә малайшийа қатарлиқ деңиз бойидики қошна дөләтләр билән игилик һоқуқи тоқунушини кәлтүрүп чиқармақта икән.
