ب د ت دۇنيا يېمەك - ئىچمەك پىروگراممىسى: نىشانىمىز يېرىم مىليون كىشىگە ياردەم قولىمىزنى سۇنۇش

تۈركىيە ئاۋازى رادىيوسى خەۋىرى: بىرلەشكەن دۆلەتلەر تەشكىلاتى  دۇنيا يېمەك - ئىچمەك پىروگراممىسى تەرىپىدىن ئېلان قىلىنغان يازما باياناتتا بىلدۈرۈلۈشىچە،  ب د ت دۇنيا يېمەك - ئىچمەك پىروگراممىسىنىڭ يېمەك - ئىچمەك ياردەملىرى سۈرىيەدە 7 – فېۋرالدىن بۇيان، تۈركىيەدە بولسا 8- فېۋرالدىن (2023) بۇيان تالاپەتكە ئۇچرىغانلارغا يەتكۈزۈپ بېرىلمەكتە ئىكەن.

 ب د ت دۇنيا يېمەك - ئىچمەك پىروگراممىسىنىڭ نىشانى ھەر ئىككى دۆلەتتە 500 مىڭ كىشىگە ياردەم قولىنى سۇنۇش بولۇپ، 8 – فېۋرالدىن باشلاپ جىددىي ئېھتىياجلىق تەخمىنەن 64 مىڭ كىشىگە ياردەم بېرىلگەن.

بۇ دائىرىدە، تالاپەتكە ئۇچرىغانلارنى ئۇلار جىددىي ئېھتىياجلىق بولۇۋاتقان يېمەك – ئىچمەك،  تەييار يېمەكلىك ئورالمىلىرى، ئائىلە يېمەك - ئىچمەك پوسۇلكىلىرى ۋە ئىسسىق تائاملار بىلەن تەمىنلىگەن.

بىرلەشكەن دۆلەتلەر تەشكىلاتى  دۇنيا يېمەك - ئىچمەك پىروگراممىسى يەر تەۋرەش ئاپىتىدە ئەڭ كۆپ تالاپەتكە ئۇچرىغان تۈركىيەنىڭ شەرقىي جەنۇبىي رايونىدىكى ۋاقىتلىق پاناھلىنىش مەركەزلىرىنى ئائىلە يېمەك - ئىچمەك پوسۇلكىلىرى بىلەن تەمىنلەش ئۈچۈن كۆچمەنلەر ئىدارىسى بىلەن داۋاملىق ھەمكارلاشماقتا ئىكەن.

نۆۋەتتە ۋاقىتلىق پاناھلىنىش مەركەزلىرىدە، ھىمايە ئاستىدىكى 44 مىڭ سۈرىيەلىك مۇساپىردىن باشقا، يەر تەۋرەش ئاپىتى سەۋەبىدىن ئۆي – ماكانلىرىدىن ئايرىلىپ قالغان تۈركىيە پۇقرالىرىمۇ پاناھلانماقتا ئىكەن.

بىرلەشكەن دۆلەتلەر تەشكىلاتى  دۇنيا يېمەك - ئىچمەك پىروگرامىسى بۇ دائىرىدە، ئوسمانىيەدىكى «جەۋدەتىيە مۇساپىرلار لاگېرى» دا پاناھلىنىۋاتقان 17 مىڭ تالاپەتكە ئۇچرىغۇچىغا تۈركىيە قىزىلئاي جەمئىيىتى بىلەن زىچ ھەمكارلىشىپ، يېمەك - ئىچمەك پوسۇلكىلىرىنى تارقىتىپ بېرىشكە باشلىغان.

بۇنىڭدىن باشقا يەنە،  ب د ت دۇنيا يېمەك - ئىچمەك پىروگراممىسى پائال پائالىيەت ئېلىپ بېرىۋاتقان ئاشخانىلارنىڭ سانىنى كۆپەيتىپ، يەر تەۋرەش ئاپىتىدە تالاپەتكە ئۇچرىغانلارنى كۈندىلىك ئىسسىق تاماق بىلەن تەمىنلەيدىكەن.

بىرلەشكەن دۆلەتلەر تەشكىلاتى  دۇنيا يېمەك - ئىچمەك پىروگراممىسى ۋە شېرىكلىرى سۈرىيەدە پاناھلىنىش ئورۇنلىرىىدا پاناھلىنىۋاتقان 38 مىڭ تالاپەتكە ئۇچرىغۇچىنى تەييار يېمەكلىك ئورالمىلىرى ۋە ئىسسىق تاماقلار بىلەن تەمىنلىگەن.