amérika xitayning «jasusluq shari» ni étip chüshürdi
amérika hawa boshluqigha kirgen xitayning «jasusluq shari» amérika armiyesi teripidin étip chüshürüldi.
türkiye awazi radiyosi xewiri: amérika tashqi ishlar ministiri antoni blinkénning xitay ziyaritini kéchiktürüshige seweb bolghan xitayning «jasusluq shari», amérika chong quruqliqidin atlantik okyangha ötkende, amérika armiyesining urush ayropilanliri teripidin étip chüshürüldi.
hejimi üch aptobusining chongluqida ikenliki bildürülgen we 18 ming métir égizlikte uchqan xitayning «jasusluq shari» ning qalduqlirini chiqirish xizmetliri dawamlashmaqta.
amérika pirézidénti jo baydin xitaygha tewe «jasusluq shari» » ning étip chüshürülüshi heqqide toxtilip: «charshenbe küni manga shar toghrisida melumat bérilgende, men amérika dölet mudapie ministirliqigha uni tézdin étip chüshürüshni buyrudum» dédi.
baydin xitayning «jasusluq shari» quruqluqimiz üstidiki chaghda héchkishige ziyan yetküzmeslik üchün (étip chüshürüshke munasip) «eng yaxshi peyt» ni kütkenliklirini bildürdi we bu étip chüshürüsh herikitini emelge ashurghan eskerlerni tebriklidi.
amérika dölet mudapie ministiri ostinmu yazma bayanatida: «xitayning amérika chong quruqluqidiki istratégiyelik jaylarni közitish üchün ishqa salghan jasusluq shari amérika déngiz tewelikide étip chüshürüldi» dédi.
ostin amérika armiyesi qomandanlirining «quruqluqtiki chaghda sharni hejimi, égizliki we közitish iqtidari sewebidin étip chüshürüshning kéreksiz xeter peyda qilidu» dégen qarargha kelgenliklirini, sharning yönilishi we istixbarat toplash paaliyitiningmu yéqindin közitilgenlikini eskertip, sharni étip chüshürüsh herikitining kanada hökümitining maslishishi we qollishi bilen emelge ashurulghanliqini bildürdi.
amérika dölet mudapie ministirliqi2 - féwralda (2023) xitaygha tewe ikenliki bildürülgen yuqiri égizliktiki jasusluq sharining amérika chong quruqluqida uchqanliqini we amérika armiyesining sharni közitiwatqanliqini élan qilghan idi.
xitay mesulliri bolsa, sharning xitaygha tewe puqrawi hawa apparati ikenlikini, métérologiyelik tetqiqatqa ishlitilgenlikini, shamalning sörep kétishi sewebidin xata halda amérika hawa tewelikige kirip qalghanliqini bildürgen idi.
