зеленский русийәни рождествадин илгири әскәрлирини чекиндүрүшкә чақирди

түркийә авази радийоси хәвири: украина пирезиденти володимир зеленский германийә нөвәтчи рәис болуватқан G7 дөләт гуруһи рәһбәрлириниң қатнишиши астида өткүзүлгән тор йиғиниға синлиқ қатнашти.

у бир қанчә айдин буйан русийәгә қарши урушниң давамлишиватқанлиқини хатирилитип, украинаға қилинған һәрбий, сәһийә, иҗтимаий вә малийә йардәмлири сәвәбидин G7 дөләт гуруһи дөләтлиридин миннәтдар икәнликлирини қәйт қилди.

у уруш давамлишиватқанлиқи үчүн украинаниң күчлүк һәмкарлиққа еһтийаҗлиқ икәнликини билдүрүп: «һәммиңлардин әмәлгә ашурулған бу һәмкарлиқларни келәр йилиму (2023) давамлаштурушуңларни сораймән. русийә һуҗумлирини давамлаштуруватиду вә бу сәвәбтин украинаға қилиниватқан йардәмләр давамлишиши керәк» деди.

у русийәниң украинаға селиштурғанда нурғун башқурулидиған бомба вә зәмбирәк системилириға игә икәнликини әскәртип, украинаға қилиниватқан қорал-йарағ йардәмлирини көпәйтиш керәкликини қәйт қилди.

у русийә армийәсиниң украинадики ачқучлуқ енергийә ул-әслиһәлиригә һуҗум қилип, пәқәт украинанила әмәс, бәлки йавропа дөләтлириниму енергийә апитигә қарап иттиришкә урунуватқанлиқини илгири сүрди. у мундақ деди:

«силәрни тәбиий газ мәсилисидә украинаға қилиниватқан йардәмләрни көпәйтишкә тәклип қилимән.»

у украина оттуриға қойған тинчлиқ пиланиниң иҗра қилиниши үчүн хәлқаралиқ бир мунбәрниң өткүзүлүши керәкликини билдүрди.

у русийәни мәсилини конкрет һәл қилиш мусаписи үчүн зөрүр қәдәмләрни ташлашқа дәвәт қилип, алдимиздики күнләрдә дунйа миқйасида тәбриклинидиған рождества байримини хатириләтти вә байрам күнлиридә русийәни армийә қисимлирини украинадин чекиндүрүшкә чақирди.

у русийәгә тәклип қилинған мәсилини һәл қилиш чариси орундалған әһвалда тинчлиқни әмәлгә ашурушниң мумкин болидиғанлиқиға ишинидиғанлиқини тәкитләп, әмди москвадин хәвәр күтидиғанлиқлирини қәйт қилди.