б д т: украина нопусиниң үчтин бири дөләтни тәрк әтти
бирләшкән дөләтләр тәшкилати русийә уруш қозғиған 24 – февралдин буйан украина нопусиниң үчтин бириниң бу дөләтни тәрк әткәнликини билдүрди.
түркийә авази радийоси хәвири: бирләшкән дөләтләр тәшкилати кишилик һоқуқ мутәхәссислири тәрипидин елан қилинған ортақ йазма байанатта, украина мусапирлириниң әһвали һәққидә мәлумат берилди.
байанатта, уруш башланғандин кейин украина нопусиниң үчтин бириниң дөләтни тәрк әткәнлики, көп сандики айаллар, балилар, йашанғанлар вә мейип мусапирларниң адәттин ташқири дәриҗидә мудапиәсиз һаләттә икәнлики қәйт қилинди, мусапирлар вә уларниң аилә-тавабиатлирини қоғдашниң хәлқара қанунниң тәқәззаси икәнлики, балиларни қоғдашқа алаһидә әһмийәт беришниң зөрүрлүки тәкитләнди.
йәнә бир тәрәптин, бирләшкән дөләтләр тәшкилати инсанпәрвәрлик ишлирини маслаштуруш ишханиси, русийәниң түнүгүн украинадики пуқралар олтурақ районлириға қилған башқурулидиған бомба һуҗумлири нәтиҗисидә миңлиған аилиләрниң ток вә учур - алақә имканийәтлиридин мәһрум қалғанлиқини билдүрди.
бирләшкән дөләтләр тәшкилати инсанпәрвәрлик ишлирини маслаштуруш ишханиси тәрипидин елан қилинған байанатта, русийәниң һуҗумлириниң украинадики инсанпәрвәрлик йардәм паалийәтлириниңму үзүлүп қелишиға сәвәб болғанлиқи, җүмлидин, б д т ға қарашлиқ тәшкилатларниң еһтийаҗлиқ районларға инсанпәрвәрлик йардәм буйумлирини йәткүзәлмәйватқанлиқи тәкитләнди.
байанатта, бирләшкән дөләтләр тәшкилати вә райондики инсанпәрвәрлик йардәм һәмраһлириниң украинада қелип, инсанпәрвәрлик йардәм паалийәтлирини үзлүксиз давамлаштуруш ирадисиниң қәтийлики әскәртилди.
