боррел йавропаниң иранға бәзи чәклимиләрни қойидиғанлиқиниң сигналини бәрди

түркийә авази радийоси хәвири: йавропа иттипақиниң ташқи мунасивәт вә бихәтәрлик сийасити бойичә алий вәкили җосеп боррел, мәһса әмининиң өлтүрүлүшигә қарши башланған намайишларниң қаттиқ қоллуқ билән бастурған иранға қарита чәкләш тәдбирлирини өз ичигә алған һәрхил таллашларни музакирә қилидиғанлиқлирини билдүди.

җосеп боррел йавропа парламентиниң иран вәзийити тоғрисидики омумий кеңәш йиғинидики сөзидә, 17-өктәбир өткүзүлидиған йавропа иттипақиға әза дөләтләр ташқи ишлар министирлири йиғинида чәкләш тәдбирлирини өз ичигә алған барлиқ таллашларниң музакирә қилинидиғанлиқини билдүрди.

у өткән айда америка қошма иштатлириниң нйуйорк шәһиридә өткүзүлгән бирләшкән дөләтләр тәшкилати омумий кеңиши йиғинида, иран пирезиденти ибраһим рәисини иран пуқралириниң асасий һоқуқлириға һөрмәт қилиш вә маһса әмининиң өлүминиң гумандарлириниң җавабкарлиқини сүрүштә қилишқа чақирғанлиқини тилға елип өтти.

ирандики намайишларда мувазинәтсиз күч ишлитилгәнликини тилға алған боррел: «нәччә он кишиниң һайатидин айрилғанлиқини, вәқәләрни хәвәр қилған мухбирларниң йариланғанлиқини йаки назарәт астиға елинғанлиқини, торға чиқишқа чәклимә қойуш арқилиқ тоғра учурға еришиш вә пәрқлиқ пикирләрниң оттуриға чиқишиға тосқунлуқ қилинғанлиқи»ни билдүрди.

иранға қарита бәзи тәдбирләрни йолға қойуш мәсилисиниң әтә йавропа парламентида авазға қойулуши пиланланмақта.