йапонийә русийәдин өч алди
йапонийә һөкүмити шималий хоккайдо өлкисидә вәзипә өтәватқан бир руси дипломатни «қарши елинмайдиған киши» дәп елан қилди.
түркийә авази радийоси хәвири: русийә федератсийәси бихәтәрлик идарисиниң, йапонийәниң русийәниң виладивосток шәһиридики консулханисида ишләйдиған бир дипломатини назарәт астиға елишиниң ғулғулиси давам қилмақта؛ йапонийә ташқи ишлар вазарити, русийәниң йапонийәниң шималий хоккайдо өлкиси саппоро шәһиридики консулханисида ишләйдиған бир дипломатиниң «қарши елинмайдиған адәм» дәп елан қилинғанлиқини уқтурди.
йапонийә ташқи ишлар вәзири һайаши йошимаса, исмини ашкарилашни халимиған русийә дипломатиниң 10-өктәбиргичә йапонийәдин чиқип кетишини тәләп қилди.
һайашиниң ейтишичә, муавин ташқи ишлар вәзири мори такео русийәниң токйода турушлуқ баш әлчиси михайил галузинни министирлиққа чақиртип, мәзкур дипломатни чеградин қоғлап чиқириш қарарини йәткүзгән.
русийә федератсийәси бихәтәрлик идариси йапонийәниң русийәниң виладивосток шәһиридики консулханисида ишләйдиған дипломат мотоки татсунорини «җасуслуқ җинайити садир қилиш» билән әйибләп назарәт астиға алғаниди.
йапонийә ташқи ишлар вазарити һайаши мотоки татсунориниң назарәт астиға елинишиға наразилиқ билдүргән, мотокиниң «көзиниң теңилип, җисманий җәһәттин зорлуққа учриғанлиқи» ни илгири сүргәниди.
йапон дипломатниң «һечқандақ қанунсиз һәрикәткә арилашмиғанлиқи» ни билдүргән һайаши, русийәниң мәйданиға «вийенна әһдинамисигә очуқ - ашкара һалда еғир хилаплиқ қилиш» дәп баһа бәргәниди.
русийә федератсийәси бихәтәрлик идариси байанат елан қилип, мотокиниң «русийәниң бир асийа-тинч окйан дөлити билән болған һәмкарлиқи вә ғәрбниң җаза сийаситиниң пириморский райониниң иқтисадий вәзийитигә көрсәткән тәсири һәққидики чәклик учурларни пул берип сетивеливатқан әснада назарәт астиға елинғанлиқи» ни уқтурғаниди.
