зеленский хәлққә уруш тоғрисида мәлумат бәрди

түркийә авази радийоси хәвири: украина пирезиденти володимир зеленский хәлққә хитаб қилип сөзлигән нутуқида, уруш тоғрисида йеңи өзгиришләр үстидә тохталди.

у одеса шәһириниң русийәниң қайта һуҗумиға учриғанлиқини хатирилитип: «русийә дөләт мудапиә министирлиқи бу хил һуҗумлар тоғрисида қанчилик йалған сөзлишидин қәтийнәзәр, буниңға чоқум җаваб қайтуримиз. ишғалчилар җазасини тартмай қалмайду» деди.

у русийәниң өз хәлқигә урушқа мунасивәтлик тоғра учур бәрмигәнликини илгири сүрүп: «һазир русийәниң өлгән әскәрлири сани тәхминән 40 миңға йәтти. русийә армийәсиниң 24-февралдин буйан йоқатқан әскәр сани мушунчивала көп. техи онмиңларчиси йариланди» деди.

у әнглийәниң русийәгә қарши йүргүзүватқан ембаргони кеңәйтиш қарарини қизғин қарши алидиғанлиқлирини әскәртип: «онларчә киши вә органлар ембарго тизимликигә киргүзүлди. әнглийәниң ембарго мәсилисидики тоғра вә тәврәнмәс ирадиси үчүн тәшәккүр ейтимән. бу ғәрб дунйасидики һәммә киши әгишиши керәк болған йахши үлгә» деди.

у ахирида тәбиий газ киризиси үстидә тохтилип, мундақ деди:

«болупму йавропа базирида бир куб метир газ баһасиниң 2 миң доллардин ешип кәткәнлики тоғрисидики хәвәрләр, русийәгә қаритилған җазани кеңәйтишниң йетәрлик сәвәби болалайду. чүнки русийәниң йавропаға қәстән баһада террорлуқ қиливатқанлиқи һәммигә айан.»