putin afghanistan mesilisini muzakire qilish üchün tajikstanni ziyaret qildi

türkiye awazi radiyosi xewiri: rusiye pirézidénti wladimir putin ukraina-rusiye urushi bashlanghan 24ـ féwraldin buyanqi tunji qétimliq chet el ziyaritini tajikstandin bashlidi. u paytext düshenbide tajkstan pirézidénti imameli raxman bilen körüshti.

u körüshüshning axbaratqa ochuq qismida bayanat élan qilip, rusiye-tajikstan munasiwetlirining tereqqiy qilghanliqini we ikki terep sodisining éshishida yilning deslepki 4-3 éyida «rékort» sewiye yaritilghanliqini bildürdi.

u xewpsizlik mesililirige ehmiyet béridighanliqlirini eskertip: «afghanistanda weziyetning yaxshilinishi üchün qolimizdin kélishiche tirishchanliq körsitimiz. weziyetni kontrol qilghan küchler bilen munasiwet ornitishqa tirishimiz. barliq étnik guruppilar afghanistan hakimiyitige qatnishishi kérek, dep qaraymiz. bu toghridiki tirishchanliqlirimizni dawamlashturimiz» dédi.

u afghanistandiki barliq siyasiy küchler bilen alaqe qiliwatqanliqlirini, afghanistan heyitining iyun éyining (2022) béshida pétérsburg xelqara iqtisad munbirigha qatnashqanliqini xatiriletti.

tajikstan pirézidénti imameli raxman rusiyening tajikstanning aldinqi qatarda turidighan soda we iqtisadiy shériki bolushni dawamlashturuwatqanliqini bildürdi.

u: «yilning deslepki besh éyida özara soda hejimi %50 ashti. rayonlar arisidiki hemkarliqlar tereqqiy qiilwatidu. rusiyediki 80 din artuq rayonning tajikstan bilen soda we bashqa munasiwetliri bar. ikki dölet otturisidiki qoyuq xewpsizlik hemkarliqlar dawamlishiwatidu» dédi.

u axirida, putin bilen afghanistanning nöwettiki weziyitini muzakire qilishqa teyyar ikenlikini qeyt qildi.