nato bashliqlar yighinida, xitay we rusiyege qarshi muhim qararlar chiqirilidu

türkiye awazi radiyosi xewiri: türkiye jumhur reisi rejep tayyp erdoghan bilen amérika pirézidénti jo baydin resimge chüshüsh jeryanida qol éliship körüshti we nato bash katipi stolténbérg bilen birlikte resimge chüshti.

ikki rehber arqidin engliye bash weziri boris jonsonning yénigha bérip uzunghiche söhbetleshti.

nato bash katipi stolténbérg ukraina témiliq yighinning échilishida, yighinda rusiye we xitaygha oxshash diktator döletler qaide-pirinsiplargha tayanghan tertipke qarshi chiqqan we küchlük riqabetke tolghan dunyada, natoni kücheytish üchün muhim qararlarning chiqirilidighanliqini éytti.

u natoning heriket pilani xususiyitidiki istratégiyelik uqum höjjitining yéngi nusxisining qobul qilinidighanliqini xatirilitip, ittipaqning mudapiesini we emeliy küchini zoraytidighanliqlirini, shiwétsiye bilen finlandiyening teklip qilinishi bilen natoning ishikining ochuq ikenlikining namayan qilinidighanliqini eskertti.

u ukraina pirézidénti wolodimir zélénskiyning rehberlerge xitab qilip nutuq sözleydighanliqini we ukraina üchün yardem pilanning qobul qilinidighanliqini qeyt qildi.

nato bashliqlar yighinigha sahibxanliq qilghan ispaniye bash ministiri pédro sanchéz: «biz alidighan qararlar kelgüsi 10 yilliq iqtidarimizni we menbelirimizdin paydilinishimizni belgileydu. dunya bizge diqqet qiliwatidu. hemme kishige ittipaqliqimizni we barawerlikimizni, kütken ümidke jawab béreleydighanliqimizni körsitimiz» dédi.

u: «shiwétsiye bilen finlandiyening natogha eza bolushi muhim burulush nuqtisi hésablinidu» dédi.