amérika rusiyeni térrorizmni qollighuchi döletler tizimlikige kirgüzüsh mesilisini muzakire qilmaqta
amérika tashqi ishlar ministiri antoni blinkén munasiwetlik orunlarning rusiyeni térrorluqni qollaydighan döletler tizimlikige kirgüzüsh – kirgüzmeslik mesilisi üstide izdiniwatqanliqini éytti.
türkiye awazi radiyosi xewiri: amérika tashqi ishlar ministiri antoni blinkén kéngesh palatasidiki xamchot yighinida, 24-féwraldin (2022) buyan dawam qiliwatqan rusiye-ukraina urushi toghrisidiki qarashlirini otturigha qoydi.
u jumhuriyetchiler partiyesi kéngesh palata ezasi lindséy grahamning «rusiyeni térrorluqni qollaydighan döletler tizimlikige kirgüzüshni oylawatamsiler?» dégen soaligha jawab bérip: «biz buninggha qarawatimiz, adwokatlirimiz bundaq bir qedemning munasiwetlik qanunlargha uyghun yaki emeslikini jezmleshtürüshke tirishiwatidu. emma manga nisbeten, ruslarning ukrainani térrorlashturghanliqida shek yoq» dédi.
rusiyening süriyedin kéyin emdilikte ukrainada weyranchiliqqa seweb boluwatqanliqini eskertken graham, hökümetning bu yönilishte tashlaydighan her qandaq qedimini pütkül kéngesh palatasining toluq qollaydighanliqini we rusiyening térrorluqni qollaydighan döletler tizimlikige qaytidin kirgüzülüshi kéreklikini otturigha qoydi.
yene bir tereptin, antoni blinkén edliye ministirliqining tonglitilghan rusiye meblighini musadire qilish – qilmasliq mesilisini tekshürüwatqanliqini tilgha alghan bolsimu, emma tekshürüshning tepsilati toghrisida melumat bermidi.
amérika tashqi ishlar ministiri yene, washingtonning kelgüsi bir nechche hepte ichide moskwa hökümitige yéngi jazalarni yürgüzidighanliqini, ukrainadiki qilmishliridin waz kechmeydighanla bolsa, rusiyege qarshi jaza dolqunlirining dawam qilidighanliqini sözlirige ilawe qildi.
