йапонийә русийәни уруш җинайити билән җазалашни тәләп қилди

түркийә авази радийоси хәвири: йапонийә ички кабинетиниң баш катипи матсоно хироказу мухбирларни күтүвелиш йиғинида, «русийә әскәрлириниң украинада пуқраларни өлтүргәнлики» тоғрисидики хәвәрләрниң йапонийә һөкүмитини «һәйран қалдурғанлиқини» вә бу қилмишларни қаттиқ әйибләйдиғанлиқлирини әскәртиш билән бир вақитта, бигунаһ пуқраларниң өлтүрүлүшини «хәлқара инсанпәрвәрлик қануниниң еғир дәриҗидә дәпсәндә қилиниши» дәп атап, «пакитларниң ашкарилиниши вә русийәниң уруш җинайити сәвәблик җазаға тартилиши» ни тәләп қилди.

йапонийәниң 7 – г гуруһи дөләтлири билән һәмкарлишиватқанлиқи вә хәлқара җәмийәт билән мас қәдәмдә һәрикәт қиливатқанлиқини қәйт қилған  хироказу, бирләшкән дөләтләр тәшкилати хәвпсизлик кеңишиниң позитсийәсини әндишә ичидә көзитиватқанлиқлирини тәкитлиди.

у йапонийәниң, украина пирезиденти влодимир зеленискиниң бирләшкән дөләтләр тәшкилати хәвпсизлик кеңишигә хитаб қилғанда әскәртиш бәргән «хәвпсизлик кеңишиниң қурулмисида ислаһат елип бериш тәләплири» даирисидә, ислаһат паалийәтлирини қоллайдиғанлиқиниму сөзлиригә илавә қилди.

украина армийәси пайтәхт кийевға йеқин буча шәһирини 1-апрел күни русийә күчлиридин азад қилип шәһәргә киргәндә, биналарниң вәйран болуп кәткәнликини, кочиларниң җәсәтләр билән толуп ташқанлиқини көргәниди.

кийев әтрапидики азад қилинған олтурақ районлирида 410 пуқраниң җәсити тепилғаниди.

русийә, пуқраларниң өлтүрүлгәнлики тоғрисидики дәваларни рәт қилған болсиму, әмма 19-март сүний һәмраһ ширкити максар тәрипидин елан қилинған сүний һәмраһ арқилиқ тартилған фото сүрәтләрдә, кочиларда җәсәтләрниң барлиқи илгири сүрүлгәниди.

америка қошма иштатлири һөкүмити мәзкур вәқәдин кейин, путинни «уруш җинайәтчиси» дәп атиғаниди.