jonson ukrainani téximu köp mudapie qoralliri bilen teminlesh toghrisida wede berdi
engliye bash weziri boris jonson ukrainani téximu köp mudapie qoralliri bilen teminlesh üchün ittipaqdash döletler bilen birlikte tirishchanliq körsitidighanliqi toghrisida wede berdi.
türkiye awazi radiyosi xewiri: engliye bash wezirlik 10-nomurluq ishxanisi boris jonsonning ukrainani téximu köp mudapie qoralliri bilen teminlesh wedisini bergenliki toghrisida bayanat élan qildi.
bayanatta, bash wezir boris jonsonning ukraina pirézidénti zélénskiy bilen téléfonda körüshüp, ingliz xelqining pütünley ukraina xelqini qollaydighanliqini tekitligenliki qeyt qilindi.
bayanatta, bash wezir boris jonsonning zélénskiy we pütkül ukrainagha bolghan qollishi hemde heyranliqining künséri éship bériwatqanliqini tilgha alghanliqi eskertildi.
bayanatta mundaq déyildi:
«rehberler rusiyening 24-féwral bashlighan yawayilarche hujumining ukraina puqralirigha qarita barghanséri éship bériwatqan tehditlirini muzakire qildi. bash wezir boris jonson engliyening putinning muweppeqiyetke érishelmeslikige kapaletlik qilish iradisini tekitlidi. u engliyening ukrainani qollash üchün qilghan xizmetlirini xulasilidi. ikki rehber boris jonsonning alte maddiliq xelqaraliq heriket pilanini muzakire qildi. rehberler ukraina armiyesining muhim éhtiyajlirini küntertipke qoydi. boris jonson téximu köp mudapie qoralliri bilen teminlesh üchün ittipaqdashlar bilen birlkte tirishchanliq körsitish toghrisida wede berdi.»
bayanatta yene, boris jonson bilen zélénskiyning rusiyening qalaymiqan hujumliri we urush toxtitishqa qiliwatqan xilapliqliri we barghanséri yamanlishiwatqan insaniy weziyetnimu muzakire qilghanliqi qeyt qilindi.
