amérika israiliyedin izahat bérishini telep qildi
amérika qoshma ishtatliri ishghal astidiki iyordan deryasining gherbiy qirghiqining ramallah shehiride 80 yashliq tutqun pelestinlikning israiliye eskerliri teripidin öltürülüshi heqqide israiliye hökümitidin izahat bérishini telep qildi.
türkiye awazi radiyosi xewiri: amérika qoshma ishtatliri tashqi ishlar ministirliqi bayanatchisi néd prays, kündilik muxbirlarni kütüwélish yighinida, israiliye küchlirining ramallahqa qarashliq jeljeliyye yézisigha bésip kirgende tutqun qilghan ömer abdulmejid esed isimlik pelestinlikning öltürülüshige alaqidar bir soalgha jawab bergende, mundaq dédi: «amérika puqrasi ömer esedning ramallah etrapidiki bir sheherde ölgenliki rast, bu tiragédiye heqqide teziye bildürüsh üchün esedning aile tawabiatliri bilen alaqe ornattuq, jümlidin, uning barliq aile ezalirigha konsulxana yardimi berduq. bu heqte izahat bérishi üchün israiliye hökümiti bilenmu alaqe ornitiwatimiz, silergimu melum bolghinidek, israiliye dölet mudapie tarmaqliri bu mesilini dawamliq tekshürüwatqanliqini bildürdi, bizmu bu weqening tepsiliy tekshürülüp, éniqlap chiqilishini qollaymiz.»
israiliye eskerlirining, jeljeliyye yézisigha bésip kirish jeryanida esedning qoligha kishen sélip, uni urghanliqi ashkarilanghanidi.
israiliye eskerlirining bir mezgildin kéyin yézidin ayrilghanliqi, yéza ahalisining yashanghan pelestinlikni qurulushi dawamlishiwatqan bir öydin tapqandin kéyin, ramallahtiki bir doxturxanigha orunlashturghanliqi, emma uning dawalash ünüm bermey hayatidin ayrilghanliqi bildürülgenidi.
