taliban afghanistanning chong küchlerning toqunush meydani bolushigha ruxset qilmaydighanliqini bildürdi
mutteqi afghanistanning chong küchlerning toqunush meydani bolushigha ruxset qilmaydighanliqlirini, barliq qoshniliri we xelqaraliq jemiyetler bilen özara hörmet qilishqa tayanghan munasiwet ornitishni xalaydighanliqlirini éytti.
türkiye awazi radiyosi xewiri: taliban tashqi ishlar ministir wekili emirxan mutteqi amérika paytexti washingtonda «afghanistan teshkilatliri» we «amérika zakat wexpi» birlikte ötküzgen «afghanistan üchün tinchliq we insanperwerlik yardem konféransi» gha sinliq qatnashti.
u amérika bilen taliban otturisida 2020-yili féwralda tüzülgen kélishimning, afghanistandiki chet el küchlirining chékinishining yolini achqan muhim burulush nuqtisi ikenlikini bildürdi.
u mundaq dédi:
«mesuliyetchan terep bolush süpitimiz bilen, afghanistangha, dunyada muqimliq, iqtisadiy éshish we téximu yaxshi kélechek berpa qlishta ijabiy rol oynishi üchün purset bérishning waqti yétip keldi.»
u afghanistanning awghustt (2021) ta intayin hel qilghuch mezgilni bashtin kechürgenlikini eskertip, amérikaning chékinishi we talibanning dölet kontrolluqini qoligha élishining, endishe qilinghanning del eksiche intayin tinchliq muhiti astida emelge ashqanliqini bildürdi.
u: «afghanistan islam emirliki paytext kabulgha milliy ittipaqliq signali bilen kirdi. tinchliq, qérindashliq qollirini sabiq siyasiy we herbiy reqiplirige uzatti. tarixta bundaq medeniy, insani we islamiy ijraat nahayiti az körülgen» dédi.
u amérika bilen qatar paytexti dohada imzalighan kélishimning, afghanistan bilen dunya otturisidiki munasiwetning asasliq ramkisini teshkil qilidighanliqini bildürüp, sözini mundaq dawamlashturdi:
«qoshnilirimiz, rayon we dunya bilen, ijabiy munasiwet ornitish üchün tirishchanliq körsitiwatimiz. chong küchlerning toqunush meydani yaki her qandaq shekildiki düshmenlikining parchisi bolmasliqimiz üchün, özara hörmet qilishqa tayanghan halda barliq döletler bilen ijabiy munasiwetler ornitishni ümid qilimiz.»
u afghanistanni asiyadiki hemkarliq köwrükige aylandurushni xalaydighanliqlirini eskertip: «emdi hergizmu héchkimning afghanistan zéminlirini bashqilargha ziyan sélish üchün paydilinishgha ruxset qilmaymiz. bashqa döletlerning qanuniy menpeet we teleplirige hörmet qilimiz, bizmu oxshash jawabni kütimiz» dédi.
u sabiq hökümettin qalghan 500 ming xizmetchining xizmitini dawamlashturuwatqanliqini tekitlep, héchkimge bir tereplime muamile qilmighanliqlirini qeyt qildi.
